Müasir tariximizin ən dəhşətli faciələrindən biri olan Xocalı soyqırımının 30-cu ildönümü ilə əlaqədar fevralın 26-da Bakının Xətai rayonunda faciə qurbanlarının xatirəsinə ucaldılan abidə ziyarət olunub.

Budəfəki anım mərasimində fərqli hisslər yaşanıb. Qırx dörd günlük Vətən müharibəsinin böyük Qələbə ilə başa çatması, Qarabağın işğaldan azad olunması nəticəsində şəhidlərimizin, eləcə də Xocalı soyqırımı qurbanlarının qanı yerdə qalmayıb, qisası alınıb.

Anım mərasimlərinin iştirakçıları AZƏRTAC-a müsahibələrində bu dəhşətli cinayəti törədən erməni faşistlərinə dərin nifrət hisslərini dilə gətirib, soyqırımının təşkilatçıları və icraçılarının ədalət məhkəməsi qarşısında dayanacaqlarına, öz cəzalarını alacaqlarına inandıqlarını bildiriblər.

Xocalı soyqırımı qurbanlarının xatirəsini yad etmək, insanlığa qarşı yönəlmiş bu vəhşi qətliamı bir daha beynəlxalq ictimaiyyətin diqqətinə çatdırmaq məqsədi daşıyan anım mərasimi göstərir ki, xalqımız bu faciəni heç vaxt unutmayacaq.

Xatırladaq ki, 1992-ci il fevralın 25-dən 26-na keçən gecə erməni silahlı birləşmələri Xocalı şəhərinə hücum edərək dinc əhaliyə vəhşicəsinə divan tutublar. Şəhərin 613 sakini, o cümlədən 63 uşaq, 106 qadın xüsusi amansızlıqla qətlə yetirilib. Soyqırımı nəticəsində 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib. Girov götürülən 1275 nəfərdən 197-nin taleyi indiyədək məlum deyil.

AZƏRTAC