İkinci Qarabağ savaşında Azərbaycanın qeyrətli övladları 44 gündə düşməni məhv edərək xalqımıza zəfər sevincini yaşatdılar. Onların bu hünəri həm də bütün dünyanı heyrətə saldı. Qan töküb torpağı Vətən edən minlərlə igidin arasında dağlar diyarı Yardımlıdan olan Sadiq Feyziyevin, Elşən Sultanlının adları da iftixarla çəkilir. 30 il əsir Qarabağın yağıdan azad olmasında şücaət göstərib şəhidlik zirvəsinə ucalan bu Vətən sevdalıları Prezident İlham Əliyevin sərəncamları ilə ölümüdən sonra hər iki qalib şəhid 3-cü dərəcəli “Vətənə xidmətə görə” ordeni, “Vətən uğrunda”, “Cəsur döyüşçü” və “Suqovuşanın azad olunması” medalları ilə təltif ediliblər.
Bu günlər Yardımlı Rayon İcra Hakimiyyətinin başçısı Ayaz Əsgərov başda olmaqla, idarə rəhbərləri, əhali tərəfindən Sadiq və Elşənin əziz xatirələri ehtiramla anılıb, məzarlarına təzə güllərdən çələng hörüblər. Çıxışlarda elin qəhrəman oğullarının şərəfli ömür və döyüş yolundan, ərazi bütövlüyümüz uğrunda gedən döyüşlərdə göstərdikləri şücaətdən, Ali Baş Komandanın rəhbərliyi altında Azərbaycan Ordusunun qazandığı şanlı zəfərdən danışılıbdır.
Şəhidlərin ailə üzvləri, yaxınları diqqət və qayğıya, eləcə də Vətən yolunda canından keçən hər bir şəhidin xatirəsinin daim uca tutulmasına görə Azərbaycan Prezidenti İlham Əliyevə, Birinci vitse-prezident Mehriban xanım Əliyevaya dərin minnətdarlığını bildiriblər.
Zəfər ORUCOĞLU.