"Biz bundan sonra qalib ölkə, müzəffər xalq kimi yaşayacağıq və azad edilmiş torpaqları quracağıq, bərpa edəcəyik. O torpaqlara artıq həyat qayıdır, insanlar qayıdır. Bu qayıdışı ən qısa müddət ərzində təmin etmək bu gün bizim başlıca vəzifəmizdir". Müzəffər Ali Baş Komandan, Prezident İlham Əliyevin bu sözləri sentyabrın 27-də Qaçqınların və Məcburi Köçkünlərin İşləri üzrə Dövlət Komitəsində keçirilən Anım Gününə həsr olunmuş toplantısında xatırladılıb.

Komitənin mətbuat xidmətindən AZƏRTAC-a bildiriblər ki, tədbirdə çıxış edən komitə sədri Rövşən Rzayev bir il əvvəl işğalçı Ermənistanın növbəti hərbi təxribatına qarşı Azərbaycan Ordusunun həyata keçirdiyi və Qələbə ilə başa çatan əks-hücum əməliyyatında xalqımızın qəhrəman övladlarının göstərdiyi şücaətlərin tarixdə əbədi iz qoyduğunu diqqətə çatdırıb. Qeyd edib ki, Prezident İlham Əliyevin böyük cəsarəti və qətiyyəti, dəqiq və məqsədyönlü hərbi-siyasi və diplomatik addımları, hərbçilərimizin rəşadəti sayəsində torpaqlarımızın işğaldan azad edilməsi uğrunda şiddətli döyüşlərdə düşmən ağır məğlubiyyətə uğradılıb, üç rayonu - Ağdam, Kəlbəcər və Laçını isə döyüşsüz tərk etməyə məcbur olub.

Eyni zamanda, işğaldan azad edilmiş Qarabağda və Şərqi Zəngəzurda hazırda bərpa-quruculuq işlərinin aparıldığı, məcburi köçkünlərin tezliklə doğma yurdlarına qayıdışına hazırlıq görüldüyü bildirilib.

Dövlət Komitəsinin kollektivi saat 12:00-da şəhidlərin xatirəsini bir dəqiqəlik sükutla yad edib, onlara Allahdan rəhmət, ailələrinə səbir diləyib.

AZƏRTAC