Ölkəmizin ərazi bütövlüyünün bərpası, doğma torpaqlarımızın düşməndən təmizlənməsi uğrunda gedən döyüşlərdə canlarını Vətən uğrunda fəda edərək xalqımıza qələbə sevincini yaşadan şəhidlərimiz hər zaman minnətdarlıqla anılacaqdır. Biləsuvar rayonunun Aşağı Cürəli kəndində Vətən müharibəsində rəşadət və igidlik göstərərək şəhidlik zirvəsinə ucalan Vətən Müharibəsi Qəhrəmanı Cavid Mahmudovun xatirəsi ehtiramla anıldı.
Mərasimdə Biləsuvar Rayon İcra Hakimiyyətinin başçısı Faiq Qürbətov, Milli Məclisin deputatı Bəhruz Məhərrəmov, rayonun hüquq-mühafizə orqanlarının rəhbərləri və rayon ictimaiyyətinin nümayəndələri iştirak edirdilər. Tədbir iştirakçıları Cavid Mahmudovun məzarını ziyarət edib, üzərinə gül-çiçək düzüb ona Allahdan rəhmət, valideyninə səbir dilədilər. Qonaqlar şəhidin ata ocağında şəhidin valideynləri ilə görüşüb, qəhrəmanın yaşadığı evə vurulan xatirə lövhəsini açdılar. Anım mərasimində F. Qürbətov qeyd etdi ki, Azərbaycan xalqının qüruru, fəxri olan şəhidlərimizin xatirəsinin daim əziz tutulacağı, dövlətimiz tərəfindən hər zaman şəhidlik zirvəsinə ucalan igidlərimizin ailələrinə diqqət və qayğı göstəriləcək.
Vətən Müharibəsi Qəhrəmanı Cavid Hilal oğlu Mahmudov 1989-cu il fevralın 6-da Biləsuvar rayonunun Aşağı Cürəli kəndində anadan olub.1995-2006-cı illərdə Aşağı Cürəli kənd tam orta məktəbində oxuyub. 2006-2010-cu illərdə Heydər Əliyev adına Azərbaycan Ali Hərbi Məktəbində ali hərbi təhsil alıb.
Cavid Mahmudov 2010-2012-ci illərdə Azərbaycan Silahlı Qüvvələrinin Daşkəsəndə 2012-2018-ci illərdə Tovuz rayonunda, 2018-2020-ci illərdə Azərbaycan Silahlı Qüvvələrinin Göygöl rayonunda yerləşən "N" saylı hərbi hissələrdə xidmətdə olub. 2020-ci ildən isə Abşeron rayonunda yerləşən hərbi hissədə xidmət edirdi.
Azərbaycan Ordusunun kapitanı Cavid Mahmudov Ermənistan tərəfindən işğal olunan ərazilərin azad edilməsi üçün başlanan Vətən müharibəsində Füzulinin azadlığı uğrunda gedən döyüşlərdə vuruşmuş və oktyabrın 5-də döyüşlər zamanı düşmən hücumunun qarşısını alarkən qəhrəmancasına şəhid olmuşdur. Şəhid Cavid Mahmudov doğulduğu Biləsuvar rayonunun Aşağı Cürəli kənd qəbiristanlığında dəfn olunmuşdur.
Azərbaycan Prezidenti İlham Əliyevin müvafiq sərəncamları ilə ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə, şəxsi igidlik və şücaət nümayiş etdirdiyinə görə Cavid Hilal oğlu Mahmudov ölümündən sonra "Vətən Müharibəsi Qəhrəmanı adına layiq görülmüş, "Vətən uğrunda" və "Cəbrayılın azad olunmasına görə" medalları ilə təltif edilmişdir.
Ərəstun ABDULOV ,
“Respublika”.