Bakı Ali Neft Məktəbinin (BANM) ictimaiyyətlə əlaqələr şöbəsindən alınan məlumatda deyilir ki, bu günlərdə Bakı Ali Neft Məktəbinin (BANM) rektoru Elmar Qasımov Türkiyənin Azərbaycandakı fövqəladə və səlahiyyətli səfiri Cahit Bağcı ilə görüşüb. Səfiri Ali Məktəbdə görməkdən məmnunluğunu bildirən Elmar Qasımov BANM-in uğurlarından bəhs edib. Bu il ölkə üzrə Prezident təqaüdünə layiq görülən 102 nəfərdən 33-nün BANM-in tələbəsi olduğunu qeyd edən rektor bildirib ki, bu, Azərbaycan təhsil tarixində ən yüksək göstəricidir. Türkiyənin Azərbaycandakı səfiri Cahit Bağcı isə Bakı Ali Neft Məktəbi kimi nüfuzlu, beynəlxalq səviyyəli bir ali təhsil müəssisəsinin fəaliyyətini yüksək qiymətləndirib.

Elmar Qasımov vurğulayıb ki, qardaş ölkələr olan Azərbaycan və Türkiyə arasında bütün sahələrdə, o cümlədən təhsil sektorunda geniş əlaqələr mövcuddur. BANM-in rektoru Türkiyə universitetləri ilə qarşılıqlı əlaqələrin  qurulmasında maraqlı olduğunu vurğulayıb. Həmçinin Türkiyə universitetləri ilə ikili diplom mövzusunda müzakirələr aparılıb. Səfir Cahit Bağcı Bakı Ali Neft Məktəbi ilə Türkiyənin ali təhsil müəssisələrinin əməkdaşlığına dəstək verməyə hazır olduqlarını bildirib.

Görüşdə qarşılıqlı əməkdaşlıq, əlaqələrin Türkiyə  universitetləri ilə BANM arasında birgə layihələrin təşkili məsələləri müzakirə olunub.

Zümrüd ABDULLAYEVA,

“Respublika”.