Salyan rayonunda "Qəhrəmanlarımızı tanıyaq” adlı silsilə tədbirlər çərçivəsində Vətən müharibəsi iştirakçısı və qazilərlə məktəblilərin görüşü davam etdirilir.
Arbatan kənd tam orta məktəbində rayon icra hakimiyyətinin və Təhsil şöbəsinin birgə təşkilatçılığı ilə “Qəhrəmanlarımızı tanıyaq” adlı silsilə tədbirlər çərçivəsində Vətən müharibəsi iştirakçısı və qazilərlə məktəblilərin növbəti görüşü keçirildi. Görüşdə “Cəsur döyüşçü” və Füzulinin, Xocavəndin, Cəbrayılın və Şuşanın azad edilməsinə görə medalları ilə təltif edilmiş əsgər Qəfərov Orxan Məmmədağa oğlu, “Suqovuşanın azad edilməsinə görə” medalı ilə təltif edilmiş əsgər Nəcəfov İlqar Bəxtiyar oğlu, “Suqovuşanın azad edilməsinə görə” Qüsursuz xidmətə görə” 90,95,100 illik yubiley medalın hər 3 dərəcəsi üzrə təltif edilmiş baş gizir Əliyev Abdulla Rəfail oğlu və rayon icra hakimiyyəti başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi Füzulinin, Xocavəndin, Qubadlının, Zəngilanın azad edilməsinə görə və “Şücaətə görə” medalları ilə təltif edilmiş əsgər Quliyev Heydər Seymur oğlu iştirak etdilər.
Tədbirdə çıxış edən Heydər Quliyev 44 günlük Vətən müharibəsində əsgər və zabitlərimizin igidliyindən, xalq-ordu birliyindən söhbət açaraq, qəhrəmanlarımızın tanıdılmasının vacibliyini bildirdi. Natiq qeyd etdi ki, neçə-neçə igid oğullarımız vətən uğrunda haqq savaşının iştirakçısı, şəhid və ya qazi oldular. Sonunda zəfər çaldığımız bu müharibə Azərbaycan xalqının vətənə necə bağlılığını, onun üçün gözünü qırpmadan canından keçməyə hazır olduğunu bir daha sübut etdi. Görüşdə iştirak edən müharibə iştirakçıları keçdikləri döyüş yolundan danışaraq, məktəblilərin suallarını cavablandırdılar.
Sonra məktəblilərin ifasında şəhidlərimizə, qazilərimizə və Vətənə həsr olunmuş ədəbi-bədii kompozisiya təqdim olundu. Məktəbin gənc şagird-rəssamları Qarabağ mövzusunda çəkdikləri rəsm əsərlərini qonaqlara hədiyyə etdilər.
Ərəstun ABDULOV ,
“Respublika”.