Ölkəmiz İnternet İdarəçilik Forumunun fəal təşkilatçısıdır
Azərbaycanda ilk dəfə olaraq 11-15 mart 2019-cu il tarixində Nəqliyyat, Rabitə və Yüksək Texnologiyalar Nazirliyi tərəfindən beynəlxalq “Kibertəhlükəsizlik həftəsi” çərçivəsində Birləşmiş Millətlər Təşkilatının (BMT) İnkişaf Proqramı ilə birgə VI Regional İnternet İdarəçilik Forumu keçirilmişdir. Forum “Kibertəhlükəsizlik bizim ortaq məsuliyyətimiz” mövzusuna həsr olunmuşdur. Regional İnternet İdarəçilik Forumunun keçirilməsində əsas məqsəd daha səmərəli, effektli regional iqtisadi inkişafa və mədəni irəliləyişə nail olmaq üçün internetin tətbiqinin müxtəlif yollarını nümayiş etdirmək olmuşdur. İdarəçilik Forumu yerli iştirakçıların beynəlxalq mütəxəssislərlə təcrübə mübadiləsi və əməkdaşlıq qurması, bu sahədə mövcud vəziyyətin, qarşıya qoyulmuş vəzifələrin, müvafiq xarici strukturlara inteqrasiya məsələlərinin birgə müzakirəsi və maraqlı innovativ layihələrin nümayişi üçün platformadır.
Bakıda keçirilən VI Regional İnternet İdarəçilik Forumunda aparılan müzakirələrdə hökumət, biznes, diplomatik korpusların səlahiyyətli nümayəndələri, elm və vətəndaş cəmiyyətinin, internet ictimaiyyətinin mütəxəssisləri iştirak etmişdir. Qeyd edək ki, bu gün ölkəmiz İnternet İdarəçilik Forumunun aktiv iştirakçısı və təşkilatçısıdır. 2012-ci ildə Bakıda İnternet İdarəçilik Forumunun keçirilməsindən sonra hər il ölkəmizdə Regional İnternet İdarəçilik Forumu keçirilməkdədir. Azərbaycan 20 ilə yaxındır ki, BMT-nin İnkişaf Proqramı ilə əməkdaşlıq edir, informasiya-kommunikasiya texnologiyaları sahəsində bir çox layihələrə dəstək verir.
Ümummilli lider Heydər Əliyev tərəfindən 2003-cü ildə təsdiq edilmiş “Azərbaycan Respublikasının inkişafı naminə informasiya-kommunikasiya texnologiyaları üzrə Milli Strategiya (2003-2012)” məhz BMT-nin İnkişaf Proqramı ilə birgə layihə çərçivəsində hazırlanıb. Həmçinin ölkəmiz üçün mühüm əhəmiyyət daşıyan “AzDatacom” şəbəkəsi, regionda ilk TİER-3 səviyyəli Data Mərkəzin qurulması birgə əməkdaşlığın nəticəsidir. Bu layihələr ölkəmizdə dayanıqlı inkişafa böyük töhfə verib. Bu gün də BMT İnkişaf Proqramı ilə sıx əməkdaşlıq davam etdirilir. Birgə əməkdaşlıq çərçivəsində hazırlanmış, “Bilik İqtisadiyyatı-Azərbaycan İnnovasiya Yol xəritəsi” ölkəmiz üçün çox önəm daşıyır. Ölkəmiz konfransda Beynəlxalq Telekommunikasiya İttifaqının Şurasına yenidən, Radiotənzimləmə Bürosuna isə ilk dəfə üzv seçilib. Qlobal İnternet İdarəçilik Forumları məhz Beynəlxalq Telekommunikasiya İttifaqının təşəbbüsüdür. Vurğulamaq lazımdır ki, “Kibertəhlükəsizlik həftəsi” çərçivəsində İnternet İdarəçilik Forumunun keçirilməsi təsadüfi deyil. Çünki müasir texnologiyalar, internet hazırda insanların, cəmiyyətin, dövlətin inkişafında əvəzedilməz rola malikdir. İnternet təhsilə, səhiyyəyə, ticarətə, mediaya, məşğulluğa və bir çox digər sahələrdə inkişaf üçün yeni imkanlar yaradıb. İnternet tətbiqləri, sosial şəbəkələr insanlar üçün müasir ünsiyyət formasına çevrilib. Bu gün internet sayəsində açıq və şəffaf idarəetmə sistemi formalaşıb, vətəndaş-dövlət münasibətləri yeni məzmun alıb. Lakin, eyni zamanda, bu inkişaf dünyada kibertəhlükəsizliklə bağlı ciddi problemlər də yaradıb. Ona görə də “Azərbaycan Respublikasının kibertəhlükəsizlik strategiyası (2019-2024)” hazırlanıb və təsdiq olunub.
İnternet İdarəçilik Forumunun keçirilməsi öz ətrafında bütün maraqlı tərəfləri birləşdirməklə milli regional və qlobal səviyyədə mövcud olan məsələlərin müzakirəsində də mühüm əhəmiyyət kəsb edir. Bu forum internetin gələcəyi ilə bağlı əhəmiyyətli müzakirələrin aparılmasına yol açıb. Eyni zamanda, forum heç kim kənarda qalmasın prinsipinə uyğun olaraq sadə insanların həyatını yaxşıya doğru dəyişmək, yeni nəsil idarəetmə üsullarını inkişaf etdirmək, eləcə də, internet texnologiyalarının potensialını daha yaxından araşdırmaq üçün yeni imkanlar irəli sürür, daha əhatəli və hər kəs üçün əlçatan olan idarəetmə platformasını yaradır. Forumda çxış edənlər Azərbaycanın Beynəlxalq Telekommunikasiya İttifaqı ilə bütün sahələrdə səmərəli əməkdaşlıq etdiyini vurğulayıb və qeyd ediblər ki, Azərbaycan Respublikasının Prezidenti cənab İlham Əliyev tərəfindən informasiya-kommunikasiya texnologiyaları, innovasiyalar sahəsinin inkişafına böyük diqqət, qayğı və dəstək göstərilir.
Bundan başqa, Bakı VI Regional İnternet İdarəçilik Forumunda “Regionun kibertəhlükəsizlik məsələləri”, “Kibertəhlükəsizlik sahəsində beynəlxalq təcrübə”, “Kibertəhlükəsizlikdə innovativ həllər” və “Uşaqlar üçün təhlükəsiz internet” mövzularında da geniş müzakirələr aparılıb. 2019-cu il 31 may-3 iyun tarixlərində Azərbaycan Gənclər Fondunun təşkilatçılığı ilə baş tutan Forumda gənclər təşkilatları, ali təhsil ocaqları, 250-ə yaxın gənc internet idarəçiliyi sahəsində debatlarda fəal iştirak etmişdir. İnternet İdarəçiliyi Forumunun təşkilində də əsas məqsəd gəncləri bir araya toplayaraq rəqəmsal texnologiyalar və internet sahəsində inkişaf tendensiyalarının müzakirə və şərh edilməsi, internet idarəçiliyinə dair siyasətin formalaşması prosesində gənclərin yaxından iştirak etməsinə şəraitin yaradılmasıdır. Forumun ilk iki günü iştirakçıların internet idarəçiliyi, təhlükəsizlik, internet resurslarının sosial və iqtisadi inkişaf məqsədləri üçün daha geniş tətbiq olunması və digər sahələrdə nəzəri və praktik bilik, bacarıqlarının gücləndirilməsinə yönəlib. Burada internet idarəçiliyinin təməl prinsipləri, gənclərin fikirlərinin formalaşmasında sosial medianın rolu və gənclər üçün internetin yaratdığı biznes imkanları və digər məsələlər ətrafında müzakirələr aparılıb. Bu foruma-Gürcüstan, Ukrayna, Hollandiya, Yunanıstan, Moldova, Serbiya, Türkiyə daxil olmaqla dünyanın müxtəlif ölkələrindən, həmçinin Azərbaycanın müxtəlif bölgələrindən əsasən, 17-19 yaş arası 24 gənc qatılıb. Gənclərin İnternet İdarəçiliyi Forumunda iştirak və çıxış edən BMT-nin İnkişaf Proqramının səlahiyyətli nümayəndəsi gənclərə müraciətində vurğulayıb ki, bu gün biz, dünyada gənclərin sayının ən çox təsadüf etdiyi bir dövrdə yaşayırıq və siz, bu önəmli dövrün, zamanın əsas öncüllərindənsiniz. Siz cəmiyyətdə müsbət dəyişiklik yaratmağa qadirsiniz və biz dayanıqlı inkişaf məqsədlərinin həyata keçirilməsi kimi mühüm bir missiyada sizə güvənirik.
BMT-nin İnkişaf Proqramı Azərbaycanda Gənclərin İnternet İdarəçiliyi Forumu kimi müxtəlif platformalar vasitəsilə ölkənin ayrı-ayrı yerlərində yaşayan və müxtəlif sosial-iqtisadi təcrübəyə malik gəncləri əhatə edən layihələr həyata keçirir və heç kim kənarda qalmasın prinsipinə uyğun olaraq inkişaf layihələrindən hər kəsin yararlana biləcəyi bir mühit yaratmağa çalışır.
Əli SADIQOV,
“Respublika”.