Azərbaycan Ordusu İkinci Qarabağ müharibəsində öz zəfər yürüşü ilə dünya hərb tarixinə parlaq səhifələr yazdı. Xarici havadarlarının köməyilə işğal etdiyi əraziləri əldə saxlamaq və daha da genişləndirmək məqsədilə düşmənin 30 il ərzində tikdiyi hərbi istehkamlar, topladığı döyüş texnikası və canlı qüvvəsi Azərbaycan ordusu tərəfindən 44 günlük müharibədə darmadağın edildi.
Azərbaycan əsgərinin ən ağır döyüşlərdə bir addım geri çəkilməmək, yaralı döyüşçülərin döyüş meydanını tərk etməmək əzmini gördükdə, erməni əsgəri qorxuya düşdü, silahı atıb döyüşdən qaçmaq məcburiyyətində qaldı. Ali Baş Komandanın sərkərdəlik məharəti sayəsində düşmənə sarsıdıcı zərbələr endirən fədakar döyüşçülərimizdən biri də igid oğlumuz baş leytenant Elmar Şahin oğlu Mirzəyevdir.
Elmar Şahin oğlunun şəhidlik zirvəsinə ucaldığı gün xatirəsi ehtiramla anıldı.
Qəhrəman şəhidimizin anım mərasimində iştirak edən Biləsuvar Rayon İcra Hakimiyyətinin başçısı Faiq Qürbətov, rayonun hüquq-mühafizə orqanlarının rəhbərləri və ictimaiyyətin nümayəndələri şəhidin ata ocağını ziyarət edərək valideynləri ilə görüşdülər. Tədbir iştirakçıları ilk öncə qəhrəman şəhidimizin məzarını ziyarət edib, ruhuna dualar oxuyub, üzərinə gül-çiçək düzərək əziz xatirəsini ehtiramla yad etdilər. Mərasimdə qəhrəmanımızın şərəfli döyüş yolundan danışılaraq bildirildi ki, Azərbaycan xalqının qüruru, fəxri olan şəhidlərimizin xatirəsi bundan sonra da daim əziz tutulacaq və dövlətimiz hər zaman şəhidlik zirvəsinə ucalan igidlərimizin ailələrinin yanında olacaqdır. Anım mərasimində rayon icra hakimiyyətinin başçısı Faiq Qürbətov Vətən müharibəsində hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyev tərəfindən şəhid baş leytenant Elmar Mirzəyevin təltif olunduğu "İgidliyə görə" və “Kəlbəcərin azad olunmasına görə” medallarını onun valideyninə təqdim etdi. Tədbir zamanı qəhrəman şəhidimizin yaşadığı evə vurulan xatirə lövhəsinin açılışı oldu.
Mirzəyev 1995-ci il mayın 1-də Biləsuvar rayonunun Ağalıkənd kəndində anadan olub.
Elmar Mirzəyev 2012-2016-cı illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alaraq "leytenant" hərbi rütbəs i alıb və 2016-cı ildən hərbi xidmətə başlayıb. Subay idi.
Azərbaycan Ordusunun baş leytenantı olan Elmar Mirzəyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində Murovdağ döyüşlərində, Füzulinin və Xocavəndin azadlığı uğrunda gedən döyüşlərdə vuruşub. Elmar Mirzəyev oktyabrın 15-də Füzuli döyüşləri zamanı şəhid olub. 16 oktyabrda doğulduğu Ağalıkənd kəndinin qəbiristanlığında dəfn olunub.
Ərəstun ABDULOV ,
“Respublika”.
