İmişlidə Vətən müharibəsində adlarını hərb tariximizə qızıl hərflərlə yazdıran igid oğullarımızın xatirəsi əziz tutulur. Vətən uğrunda canından keçən oğul və qızlarımız, onların ailələri daim yad olunur. Şanlı Zəfər yürüşündə qəhrəmanlıq göstərərək şəhidlik zirvəsinə ucalanlardan biri də Həsənov Elgün Əli oğludur. Yaşasaydı, bu gün qələbə sevincini və doğum gününü ailəsi ilə birlikdə qeyd edəcəkdi.
Həsənov Elgün Əli oğlu 1999-cu il avqustun 16-da İmişli rayonunun Bəhrəmtəpə qəsəbəsində anadan olub. Şəhidimizin doğum günündə İmişli Rayon İcra Hakimiyyətinin başçısı Elçin Rzayev, RİH-in məsul əməkdaşları, şəhidin qohumları və yaxınları tərəfindən məzarı ziyarət edilərək, üzərinə gül-çiçək dəstələri qoyulub, xatirəsi ehtiramla yad olunub.
İcra başçısı Elçin Rzayev qeyd etdi ki, ötən il sentyabrın 27-dən noyabrın 10-dək davam edən 44 günlük Vətən müharibəsində güclü həmrəyliyin, yenilməz ruhun bir daha şahidi olduq. Vətən müharibəsində Azərbaycan gəncliyi vətənpərvərliyini, əzmini bütün dünyaya nümayiş etdirdi. Rayon rəhbəri bildirdi ki, Azərbaycan xalqı Elgün Həsənov kimi oğullarla fəxr edir. Qəhrəman gənclərimizin vətən uğrunda göstərdiyi fədakarlıqlar dövlətimiz tərəfindən yüksək qiymətləndirilir, onlar orden və medallarla təltif edilməklə, ailələri dövlətin diqqət və qayğısı ilə əhatə olunur. Mərasimdə Elgünün qısa, lakin şərəfli ömür yolundan danışıldı. Şəhidimizin ailə üzvləri övladları ilə fəxr etdiklərini söyləyib, göstərilən diqqət və qayğıya görə ölkə başçısı cənab İlham Əliyevə, Birinci vitse-prezident Mehriban xanım Əliyevaya minnətdarlıqlarını bildirdilər.
44 günlük Vətən müharibəsinə qatılan gənc Elgün Həsənov Füzuli rayonu ərazisində gedən döyüşlərdə qəhrəmancasına şəhid olub. O, göstərdiyi qəhrəmanlıqlara görə Azərbaycan Prezidenti İlham Əliyevin Sərəncamına əsasən ölümündən sonra "Vətən uğrunda" medalı ilə təltif edilib.
Ərəstun ABDULOV,
“Respublika”.
