Prezident seçkilərində II turla bağlı hazırlıqlar davam edir

Türkiyədə ikinci tur prezident seçkilərinin keçirilməsinə sayılı günlər qalıb. Əhali böyük müdrikliklə yeni dövlət başçısını seçmək üçün seçmə hüquqlarından istifadə edərək, may ayının 28-də yenidən sandıq başında bir araya gələcək. Xarici ölkələrdə yaşayan Türkiyə vətəndaşları üçün artıq səsvermə prosesi başlayıb.

May ayının 20-dən etibarən 73 ölkədə 156 seçki məntəqəsi açılıb. Respublikadan kənarda 3400-dən çox seçki qutusu quraşdırılıb. Seçkilərdə 3,6 milyon vətəndaşın iştirak edə biləcəyi bildirilir. Seçicilər, onlar üçün yaradılmış seçki məntəqələrinə gedərək istədikləri namizədə səs verə biləcəklər. Ölkənin sərhəd-buraxılış məntəqələrində, hava və dəniz limanlarında da səsvermə məntəqələri yaradılıb. Bu da ölkəyə gələn və ölkədən çıxan türk vətəndaşlarının səs vermələrini asanlaşdırıb. Verilən məlumata görə xarici ölkələrdə yaşayan türk vətəndaşlarından bir milyondan çoxu artıq öz seçimlərini ediblər. Seçki prosesi mayın 24-dək davam edəcək. Sonra seçki bülletenləri və protokolları Ankaraya gətirilərək Yüksək Seçim Kuruluna (YSK) təslim ediləcək. Bazar günü saat 20.00-dan etibarən nəticələri açıqlanacaq.

Seçki günü seçicilərin iradə azadlığının və təhlükəsizliyinin qorunması üçün gərəkli tədbirlər görülür. Güc strukturlarının əməkdaşları seçkilərdə təhlükəsizliyin təmin olunmasına və səsvermə məntəqələrinin mühafizəsinə cəlb edilib. Namizədlərin təhlükəsizliklərinin təmin edilməsi liə bağlı zəruri tədbirlərin görüləcəyi bildirilir. İctimai və partiya binaları, xarici ölkənin nümayəndilikləri üçün mühafizə tədbirləri görülüb. Böyük şəhərlərdə və turizm bölgələrində, hava və dəniz limanlarında, vağzallarda, alış-veriş mərkəzlərində ciddi təhlükəsizlik tədbirləri həyata keçirilir. Bundan başqa seçki günü seçki bülletenlərinin Ali Seçki Şurasına (YSK) çatdırılması zamanı maksimum təhlükəsizlik tədbirlərinin görüləcəyi bildirilir. Seçki günü zəlzələ bölgəsindən olan vətəndaşların, qeydiyyatda olduqları şəhər və rayonlara gedib səsvermədə iştirak etmələrini təmin etmək üçün dövlət tərəfindən vəsait ayrılıb.

Prezident kürsüsü uğrunda 2 namizəd mübarizə aparır. Bunlar "Cümhur İttifaqı"nın namizədi, hakim Ədalət və İnkişaf Partiyasının sədri, hazırkı dövlət başçısı Rəcəb Tayyib Ərdoğan və "Millət İttifaqı"nın namizədi, müxalif Cümhuriyyət Xalq Partiyasının sədri Kamal Kılıçdaroğludur. "Cümhur İttifaqı"nda Ədalət və İnkişaf Partiyası, Milliyyətçi Hərəkat Partiyası, Böyük Birlik Partiyası, Yenidən Rifah Partiyası, Hür Dava Partiyası və Demokratik Sol Partiyası birləşib. "Millət İttifaqı"nda isə Cümhuriyyət Xalq Partiyası, İYİ Partiya, Səadət Partiyası, Gələcək Partiyası, Demokrat Partiyası və Demokratiya və İnkişaf Partiyası (DEVA) təmsil olunur.

Partiya rəhbərləri seçiciləri ilə yenidən izdihamlı mitinqlər keçirirlər. Zəlzələ bölgəsinə səfərlərini davam etdirən Prezident Rəcəb Tayyib Ərdoğan Qaziantepdə vətəndaşlara müraciət edib: "28 may seçkilərinin ikinci turuna bir nəfər kimi getmənizi gözləyirik. Bütün dostlarınızı, qohumlarınızı sandığa aparmalısınız".

Rəcəb Tayyib Ərdoğan deyib ki, biz orta dərəcədə zədələnmiş binaları bir günü xilas etmək üçün deyil, uzunmüddətli rekonstruksiya üçün daimi yaşayış evləri layihələrinə daxil etdik. Dünyanın elə bir ölkəsi yoxdur ki, bu qədər qısa müddətdə fəlakət dağıntılarını yığışdırsın və şəhərlərini yenidən qurmağa başlasın. Zəlzələnin ikinci həftəsindən başlayaraq daimi yaşayış evlərinin tikintisinə başladıq. Torpaq tədqiqatı və tender başa çatan yerlərdə dərhal təməllər qoyulub. Allahın izni ilə oktyabrdan noyabra kimi daimi yaşayış yerlərinin çatdırılmasına başlayacağıq.

Ölkə başçısı onu da qeyd edib ki, məqsədimiz 650 min yeni ev tikərək şəhərlərimizi tez bir zamanda dirçəltməkdir ki, bunun da 319 mini 1 ildə tamamlanacaq. Zəlzələdə evi və iş yerləri ziyan görən bütün vətəndaşlarımız çörək səbətinə, evlərinə çatana qədər durmadan işimizi davam etdirəcəyik. Zəlzələdən sonra edilən bütün səylərə baxmayaraq, zəlzələdən sağ çıxanların böyük ləyaqətlə, mətanət və səbirlə bizə verdiyi dəstək bizim ən böyük mənəviyyat mənbəyimiz oldu. 50 min insanımızı itirdik, 100 mindən çox yaralımız var idi... Onlar üçün bütün imkanlarımızı səfərbər edəcəyik.

İkinci turda ölkə vətəndaşlarının kimə etimad göstərməsi ilə bağlı aparılmış araşdırmalara gəldikdə, seçicilərin 75%-nin Rəcəb Tayyib Ərdoğana səs verəcəyinin şahidi olduq. Onlar deyirlər ki, Türkiyənin hazırkı iqtisadi vəziyyəti nə olursa-olsun, bu ölkənin indiki regional və beynəlxalq güc olma imici Rəcəb Tayyib Ərdoğanın sayəsindədir. ''Türkiyə AKP-nin uğurlu enerji diplomatiyası sayəsində Avropanın əsas qaz təchizatçısına çevrilib. Aralıq dənizinin şərqində mövqelərini qətiyyətlə qoruyan, əzilən tərəflərin, müsəlman ölkələrinin yanında güclü ittifaqlara rəğmən dayanan, ölkəmizi terror yuvalarının təxribatlarından təmizləyən də məhz Ərdoğan hakimiyyətidir. Bütün dünyanın nizamını dəyişmək iqtidarında olan raketlərin istehsalçısı bizim ölkədir və bu sənayenin inkişafına töhfə verən də AKP hakimiyyəti olub'', - deyib seçicilər.

Beləliklə, türk xalqı may ayının 28-də yenidən sandıq başına gedərək ölkəsinə olan münasibəti hiss etdirəcək.

Xatırladaq ki, Türkiyədə mayın 14-də keçirilən prezident və parlament seçkilərində prezident Rəcəb Tayyib Ərdoğan 49,52%, müxalifət sədri Kamal Kılıçdaroğlu 44,88%, ATA İttifaqının namizədi Sinan Oğan isə 5,17 faiz səs toplayıb. Ölkədə seçici fəallığı 88,92% təşkil edib.