Biznes mühiti və beynəlxalq reytinqlər üzrə Komissiyanın Müqavilələrin icrası, mübahisələrin həlli, müəssisənin bağlanması və müflisləşmə, məhkəmə sistemi və hüququn aliliyi işçi qrupunun videokonfrans formatında növbəti iclası keçirilib.

Ədliyyə Nazirliyinin mətbuat xidmətindən AZƏRTAC-a bildiriblər ki, tədbirə Ədliyyə və İqtisadiyyat nazirliklərinin, Məhkəmə-Hüquq Şurasının, Mərkəzi Bankın, Dövlət İmtahan, İqtisadi İslahatların Təhlili və Kommunikasiya, Elektron Hökumətin İnkişafı mərkəzlərinin nümayəndələri qatılıblar.

İclasda işçi qrupun 2021-ci il üçün Fəaliyyət Planının müvafiq bəndlərinin icrası üzrə görülmüş işlər, avqustun 19-da və 27-də keçirilmiş iclaslarda qərara alınmış tədbirlərin icrası vəziyyəti barədə məlumat verilib.

Həmçinin Fəaliyyət Planında müəyyən edilmiş tədbirlərin icrasının təşkili məsələləri müzakirə olunaraq zəruri işlərin görülməsi, işçi qrupun növbəti il üçün fəaliyyət planının layihəsinin hazırlanması qərara alınıb.

AZƏRTAC