ADA Universitetinin İnkişaf və Diplomatiya İnstitutu ("IDD") tərəfindən təşkil edilən "Xəzər Hövzəsi Araşdırmaları" Proqramı başa çatıb.

Bu barədə AZƏRTAC-a ADA Universitetindən məlumat verilib. Bildirilib ki, mayın 23-ü başlayan Proqramın açılış mərasimində ADA Universitetinin prorektoru, İnkişaf və Diplomatiya İnstitutunun direktoru Fariz İsmayılzadə və İnstitutun İxtisasartırma Proqramlarının rəhbəri Nərgiz İsmayılova iştirakçıları salamlayıblar.

Proqramda ölkəmizdə akkreditə olunmuş diplomatik korpusun katib, müşavir və attaşelərdən ibarət ümumilikdə 10 nümayəndəsi iştirak edib. Həmin ölkələr sırasında Əlcəzair, İraq, Misir, Macarıstan, Monteneqro, Polşa, Rusiya, Rumıniya, Sudan və Tacikistanı qeyd etmək mümkündür.

Mayın 27-si başa çatan Proqram ərzində iştirakçılar Azərbaycanın çoxşaxəli və zəngin tarixi, mədəniyyəti, eləcə də işğaldan azad edilmiş Qarabağın inkişafı ilə bağlı məlumat əldə ediblər.

Proqram çərçivəsində Azərbaycanın Birinci vitse-prezidentinin köməkçisi Elçin Əmirbəyov, ADA Universitetinin prorektoru Fariz İsmayılzadə, Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov, Xarici İşlər Nazirliyinin xüsusi tapşırıqlar üzrə səfiri Rəşad Novruz, Azərbaycan Turizm Bürosunun Baş icraçı direktoru Florian Zenqstşmid və BMT-nin Azərbaycandakı rezident-əlaqələndiricisi ofisinin koordinasiya analitiki Şəmsiyyə Mustafayeva milli mənsubiyyət, mədəniyyətlərarası ünsiyyət, işğaldan azad edilmiş ərazilərdə bərpa və yenidənquruculuq, eləcə də həmin ərazilərə məcburi köçkünlərin köçürülməsi ilə bağlı mühazirələrlə çıxış ediblər.

Proqram ADA Universiteti müəllimləri, İnkişaf və Diplomatiya İnstitutunun proqram direktorları, həmçinin protokol qaydaları üzrə təlimçilərin mühazirələri ilə davam edib.

Sonda Proqramı başa vuran iştirakçılara sertifikatlar təqdim olunub.

AZƏRTAC