İmişli rayonunun Cavadxanlı kənd tam orta məktəbində Qarabağ müharibəsi zamanı şəhidlik zirvəsinə ucalan Abdullayev Rizvan Abbas oğlunun və Əsədov İlham Qəmbər oğlunun xatirələrinə inşa edilən bulaq kompleksinin açlışı oldu. Açılış mərasimində rayon icra hakimiyyətinin məsul əməkdaşları, qazilər, ictimaiyyət nümayəndələri, şəhid ailələri, məktəbin müəllim və şagirdləri iştirak etdilər.
Dövlət himni səsləndirilib və vətənimizin bütövlüyü uğrunda canından keçən şəhidlərimizin əziz xatirələri bir dəqiqəlik sükutla yad edildi. Sonra bulağın üzərindəki örtük qaldırılıb, gül-çiçək dəstələri düzüldü. Mərasimdə çıxış edən RİH başçısının birinci müavini Səfa Ağayev Ali Baş Komandan İlham Əliyevin rəhbərliyi ilə ötən ilin sentyabrın 27- də başlanan və Zəfərlə başa çatan Vətən müharibəsində qazanılan qələbənin tarixi əhəmiyyətindən danışdı. Bildirdi ki, Rizvan və İlham kimi oğullarımızın xatirəsi heç bir zaman unudulmayacaq. O, qeyd etdi ki, ölkə Prezidenti cənab İlham Əliyev və Birinci vitse-prezident Mehriban xanım Əliyeva şəhid ailələrinin, qazilərin, müharibə iştirakçılarının qayğılarını daim diqqət mərkəzində saxlayır. Şəhidlərimizin, igid döyüşçülərimizin döyüş yolu öyrənilir və onlar göstərdikləri şücaətlərə görə medallarla təltif olunur, adları əbədiləşdirilir. Çıxışlarda Azərbaycan Ordusunun qəhrəmanlığından, 30 ildən artıq bir müddətdə işğal altında qalan torpaqlarımızın azad edilməsi ilə nəticələnən şanlı Qələbədən, şəhidlərimizin gənclərə nümunə olan qısa və şərəfli ömür yolundan danışıldı.
Xatirə bulağının açılışında Cavadxanlı kənd tam orta məktəbinin şagirdlərinin ifalarında Vətənə, ordumuza, şəhidlərimizə həsr olunan şeirlər səsləndirildi.
Ərəstun ABDULOV,
“Respublika”.