Azərbaycanın Səudiyyə Ərəbistanındakı səfiri Şahin Abdullayevin İƏT-ə üzv ölkələrin Milli Xəbər Agentlikləri Birliyinin (UNA) baş direktoru əvəzi Məhəmməd Əbd Rabbi əl-Yami ilə görüşündə AZƏRTAC-la UNA arasında əməkdaşlığın perspektivləri müzakirə olunub.
Ciddə şəhərində keçirilən görüşdə baş direktor əvəzi səfirə UNA-nın yaxın illər üçün nəzərdə tutulan fəaliyyət proqramı barədə ətraflı məlumat verib. O qeyd edib ki, Birliyin informasiya siyasəti islam dəyərləri, həmçinin şəffaflıq, etimad və etibarlı xəbərlərin yayılması üzərində qurulub. Bu baxımdan, UNA İƏT-ə üzv ölkələrin, o cümlədən Azərbaycanın rəsmi informasiya agentlikləri ilə daha sıx əməkdaşlığı nəzərdə tutur. Gələn il jurnalistlər üçün kursların keçirilməsi planlaşdırılır.
Ş.Abdullayev İƏT-ə üzv ölkələr arasında beynəlxalq əlaqələrin inkişafında və jurnalistlərin peşə hazırlığının artırılmasında UNA-nın mühüm rolunu qeyd edib. Səfir vurğulayıb ki, Azərbaycan İƏT Milli Xəbər Agentlikləri Birliyinə lazımi dəstək göstərməyə hazırdır.
AZƏRTAC