Hakimliyə namizədlər üçün test üsulu ilə keçirilən, habelə yazılı və şifahi imtahanlarda müvəffəqiyyət qazanmış 41 nəfər üçün ilkin tədris kursu başa çatıb.

Hakimlərin Seçki Komitəsindən AZƏRTAC-a bildiriblər ki, həmin namizədlərlə tədrisin nəticələri üzrə yazılı imtahan yanvarın 15-də saat 11:00-da Dövlət İmtahan Mərkəzinin binasında (Bakı şəhəri, Nəsimi rayonu, Abdulvahab Salamzadə küçəsi, 28) təşkil olunacaq.

İmtahan karantin rejiminə uyğun olaraq zəruri sosial davranış və sanitar-epidemioloji qaydalar gözlənilməklə keçiriləcək.

Namizədlər hüquqi kazus üzrə məhkəmə qərarlarının layihəsini tərtib etmək bacarıqlarını nümayiş etdirəcəklər. Bu məqsədlə namizədlər mülki, mülki-prosessual, cinayət və cinayət prosessual məcəllələri və digər aidiyyəti vəsaitləri istifadə üçün özləri ilə gətirə bilərlər.

İmtahan yerinə saat 10:00-dan etibarən gəlmək tövsiyə olunur. Namizədlər imtahana gələrkən şəxsiyyət vəsiqəsini mütləq təqdim etməlidirlər.

AZƏRTAC