Azərbaycan Ordusunun giziri Xəqani Bayramov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğal etdiyi torpaqların azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində Cəbrayılın və Qubadlının azadlığı uğrunda gedən döyüşlərdə savaşıb. Oktyabrın 21-də elə Qubadlı döyüşlərində şəhid olub.
Xəqani Bayramovun anım günü münasibətilə onun məzarı önündə tədbir keçirildi. Beyləqan Rayon İcra Hakimiyyətinin başçısı Asif Ağayev, aparatın məsul nümayəndələri, hüquq-mühafizə orqanlarının rəhbərləri, rayon idarə və müəssisə rəhbərləri, şəhidin döyüş yoldaşları, məktəb müəllimləri, ictimaiyyət nümayəndələri və məktəblilərin iştirakı ilə baş tutan mərasimdə əvvəlcə şəhidimizin məzarı önünə əklil qoyulmuş və ruhuna dualar oxundu.
Tədbirdə rayon icra hakimiyyətinin başçısı Asif Ağayev 44 günlük Vətən müharibəsində Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusunun əsgər və zabitlərinin göstərdiyi qəhrəmanlıqlardan danışmış, Xəqani Bayramovun, bütün şəhidlərimizin döyüş yolunun böyüməkdə olan nəsil üçün örnək olduğunu diqqətə çatdırmışdır.
Bayramov Xəqani Mamed oğlu 1990-cı il noyabrın 17-də Beyləqan rayonunun Təzəkənd kəndində anadan olub. Ailəli idi, vətənə əmanət iki övladı yadigar qaldı.
Şəhidin ailə üzvləri, döyüş yoldaşları və yaxınları Xəqaninin döyüşlər ərzində göstərdiyi şücaətdən, vətənə bağlılıq və sədaqətindən söz açaraq onunla birgə yaşadıqları xatirələri tədbir iştirakçıları ilə bölüşdülər.
Azərbaycan Prezidenti İlham Əliyevin müvafiq sərəncamları ilə ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə, şəxsi igidlik və şücaət nümayiş etdirdiyinə görə Xəqani Mamed oğlu Bayramov ölümündən sonra “Vətən uğrunda”, “Cəbrayılın azad olunmasına görə”, “Qubadlının azad olunmasına görə” medalları ilə təltif edilib. Tədbir məktəbli şagirdlərin şəhidlərə həsr olunmuş şeir və kompozisiyaları ilə davam edib.
Ərəstun ABDULOV,
“Respublika”.