Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən dinc aksiya 107 gündür ki, davam edir. Soyuq hava şəraitinə baxmayaraq, öz haqlı mübarizələrindən geri dönmür və tələbləri yerinə yetirilməyənə qədər də dönməyəcəklərini bəyan edirlər.
Ekofəalların tələbləri isə çox sadədir: Ermənistanla sərhəddə Laçın istiqamətində ayrıca sərhəd və gömrük nəzarəti postlarının yaradılması, torpaqlarımızda ekoloji terrora son qoyulması, Azərbaycan ərazisinə qanunsuz silah daşınmasının qarşısının alınmasıdır.
Ekofəallar öz niyyətlərini ilk gündən dünya ictimaiyyətinə düzgün formada çatdırmağa çalışıblar. Gənclər 107 gündür ki, səhərlərini Azərbaycanın Dövlət Himni ilə açır, vətənpərvərlik ruhunda yazılmış mahnılarla günlərini sonlandırırlar. Həmçinin onlar gün boyu 3 dildə, Azərbaycan, rus və ingilis dillərində şüarlar səsləndirirlər: "Azərbaycan oyaqdır, sərvətinə dayaqdır!", "Azərbaycan vahiddir, sərvətinə sahibdir!", "Ekoloji cinayətə son!", "Stop ekoterror!", "Bereqite prirodu!", "Gkoüidu net! Monitorinqu da!".
Erməni mediası isə bu haqq mübarizəsini orada yaşayan ermənilərə qarşı yönəlmiş bir aksiya kimi göstərməyə çalışırlar. Lakin biz bir daha sübut etdik ki, bu, belə deyil. Aksiyaçıların toplaşdığı ərazidən keçən yolda ilk gündən olduğu kimi, hazırda da sərbəst hərəkətə heç bir maneə yoxdur və yol humanitar məqsədlər üçün tam olaraq açıqdır. Lakin qondarma media iddia edir ki, biz guya yolu bağlamışıq. Ötən günlərdə aksiyaya dəstək məqsədilə otuz nəfərdən çox rus icmasının nümayəndəsinin gəlməsi isə bunun belə olmadığının təsdiqi idi.
Azərbaycan gəncliyinin öz torpaqları, haqq və hüquqları üçün soyuq-isti, gecə-gündüz demədən mübarizələrinə davam etməsi onların gücünü bir daha sübut etdi. Zəfər qələbəmiz zamanı olduğu kimi, Azərbaycan gəncliyinin dözümlülüyü öz əksini tapdı: "O gənclərə eşq olsun demək istəyirəm. Onlar bizim fəxrimizdir". Bu sözləri yerli telekanallara müsahibəsində Prezident İlham Əliyev bildirib. O, Azərbaycan gəncliyini yüksək səviyyədə dəyərləndirərək deyib: "Gecə-gündüz şaxtalı-qarlı havada oradadırlar. Öz haqlarını tələb edirlər və bir də Azərbaycan gəncinin nə qədər yüksək keyfiyyətlərə malik olmasını bütün dünyaya göstərirlər".
Qeyd edək ki, ötən il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və "AzerGold" Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb. Buna əsasən də, dekabrın 12-dən etibarən dinc aksiya başlayıb.
Töhfə SƏMƏDOVA,
"Respublika".