Doğma vətənimizin bütövlüyü uğrunda 44 gün davam edən bu savaş milli həmrəyliyimizin rəmzinə çevrildi, qürur mənbəyimiz kimi şanlı tariximizə əbədi həkk olundu. Bu müharibədə rəşadətlə döyüşən, düşmənə göz açmağa imkan verməyən Azərbaycanın igid oğullarından biri də İmişli rayonunda anadan olmuş Cavadlı Nemət Cavid oğludur. İmişli şəhərinin 1 saylı məktəb-liseyində Nemət Cavadlının xatirəsinə inşa edilən bulaq kompleksinin açılışı oldu.
Tədbirdə İmişli Rayon İcra Hakimiyyətinin başçısı Elçin Rzayev, hüquq-mühafizə orqanlarının rəhbərləri, şəhid valideynləri, məktəbin müəllimləri və şagirdləri iştirak edirdilər. İmişli Rayon İcra Hakimiyyətinin başçısı Elçin Rzayev Nemətin qısa, lakin şərəfli ömür yolundan, 44 günlük Vətən müharibəsində Ali Baş Komandan cənab İlham Əliyevin rəhbərliyi ilə qazanılan tarixi Qələbədən danışdı. Rayon rəhbəri qeyd etdi ki, Nemət və onun kimi şəhidlərimizin qanı yerdə qalmadı, hər birinin qisası döyüş meydanlarında alındı. Hər bir vətən övladı igidliyin, cəsarətin, qorxmazlığın nümunəsini yaratdı, qəhrəmanlıq salnaməsi yazdı. Bu gün şəhid ailələri, övladları dövlət tərəfindən diqqət və qayğı ilə əhatə olunub. Qazandığımız böyük zəfərə görə canından keçərək şəhidlik zirvəsinə ucalan Nemət Cavadlı kimi oğullarımız hər zaman ürəyimizdə yaşayacaq. Çıxış edən şəhidin atası Cavid ölkəmizdə müharibə iştirakçılarına və şəhid ailələrinə göstərilən diqqət və qayğıya görə dövlətimizin başçısı cənab İlham Əliyevə və Birinci vitse-prezident Mehriban xanım Əliyevaya ailəsi adından minnətdarlıqlarını bildirdi.
Xatirə bulağının önünə əvvəlcə tər çiçəklər düzüldü. Sonra bulaq kompleksinin açılışında Nemətin təhsil aldığı məktəbin şagirdlərinin ifasında vətənpərvərlik mövzusunda bədii kompozisiya da təqdim olundu.
Şəhidimiz Cavadlı Nemət Cavid oğlu 1995-ci il iyunun 3-də İmişli rayonunda anadan olub. 2016-cı ilin 2-5 aprelində baş verən döyüşlərdə iştirak etmişdir. Azərbaycan Ordusunun Xüsusi Təyinatlı Qüvvələrinin giziri olan Nemət Cavadlı 2020- ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün təmin olunması üçün başlanan Vətən müharibəsi zamanı Füzulinin, Cəbrayılın, Kəlbəcərin və Şuşa şəhərinin azadlığı uğrunda gedən döyüşlərdə iştirak etmişdir. Nemət Cavadlı oktyabrın 31-də Şuşa şəhərində döyüşlər zamanı qəhrəmancasına şəhidlik zirvəsinə yüksəldi. Azərbaycanın ərazi bütövlüyünün bərpa edilməsində xüsusi xidmətlərinə və döyüş tapşırıqlarını yerinə yetirən zaman göstərdiyi qəhrəmanlıq, hərbi qulluq vəzifəsini yerinə yetirən zaman igidlik və mərdlik nümayiş etdirdiyinə görə Azərbaycan Prezidenti İlham Əliyevin müvafiq sərəncamlarına əsasən Nemət Cavadlı ölümündən sonra “Qarabağ” ordeni, “Vətən uğrunda”, “Şücaətə görə”, “Xocavəndin azad olunmasına görə” və “Kəlbəcərin azad olunmasına görə” medalları ilə təltif olunub.
Ərəstun ABDULOV,
“Respublika”.
