Biz Şuşanı, bu torpaqda böyüyüb başa çatan musiqiçiləri, mütəfəkkirləri dünyaya tanıtmalıyıq. Bütün türk dövlətləri Qarabağda aparılan bərpa və quruculuq prosesində iştirak etməkdə maraqlıdır.
Bu fikirləri AZƏRTAC-a məxsusi açıqlamasında Beynəlxalq Türk Mədəniyyəti Təşkilatının (TÜRKSOY) Baş katibi Düsen Kaseinov söyləyib.
Azərbaycanın Zəfərindən qürurla danışan TÜRKSOY-un Baş katibi Şuşada həyatın yenidən canlanmasından məmnunluğunu ifadə edərək deyib: "Şuşaya yeni nəfəs, yeni ruh gəlir. Şəhər yenidən dirçəlir. Azərbaycanın uğuru bütün türk dünyasının uğurudur. Biz daha da həmrəy olmalıyıq. Nəinki mədəniyyət sahəsində, iqtisadiyyat, elm, təhsil və digər istiqamətlərdə bir-birimizdən dəstəyimizi əsirgəməməliyik".
Baş katib vurğulayıb ki, 30 ilə yaxın davam edən işğaldan sonra Qarabağda, Şuşada həyat yenidən öz axarına düşüb. Düsen Kaseinov 2023-cü il üçün Şuşanın "Türk dünyasının mədəniyyət paytaxtı" elan olunacağından məmnunluğunu ifadə edib.
AZƏRTAC