Cəlilabad Rayon İcra Hakimiyyətinin başçısı Rafiq Cəlilov və Aparatın əməkdaşları II Vətən müharibəsi döyüşləri zamanı yaralanan qazi Hüseynov Elnur Malik oğlunu evində ziyarət edib. Ziyarət zamanı ailənin problemləri və qazinin səhəti ilə maraqlanan rayon rəhbəri qaziyə smartfon telefonu hədiyyə edib, ailəyə yardım göstərilib. Rafiq Cəlilov qazi ilə söhbət zamanı ona şəfa diləyərək qeyd edib ki, öz qanı və canı bahasına Vətən torpağının müdafiəsinə qalxanlar, onların ailələri daim diqqətdə saxlanılırlar. Məhz onların göstərdiyi şücaət nəticəsində 30 ilə yaxın işğal altında olan torpaqlarımız düşmən tapdağından azad olundu. Ali Baş Komandan İlham Əliyevin rəhbərliyi ilə gedən döyüşlərdə ordumuz dünyaya qüdrətini bir daha sübut etdi. Ölkəmizdə şəhid ailələri və müharibə əlillərinin problemləri daim diqqət mərkəzindədir və son illər ərzində bu istiqamətdə çox böyük işlər görülür. RİH başçısı qeyd etdi ki, ölkə başçısı cənab İlham Əliyevin imzaladığı Fərman və sərəncamlar bunu bir daha təsdiq edir. Şəhid ailələri, müharibə əlilləri və veteranların sosial ehtiyaclarının ödənilməsi, həmçinin, bu insanların mənzil və avtomobillərlə təmin olunması, ali və orta ixtisas məktəblərində oxuyan övladlarının təhsil haqqından azad edilməsi ölkə ictimaiyyəti tərəfindən yüksək minnətdarlıqla qarşılanır.
Qazimiz keçdiyi döyüş yolundan danışıb, öz təəssüratlarını bölüşüb. Elnur Malik oğlu Hüseynov döyüşlərdə göstərdiyi qəhrəmanlığa görə Azərbaycan Respublikasının Prezidenti cənab İlham Əliyevin sərəncamları ilə “Cəsur döyüşçü”, “Füzulinin azad olunmasına görə”, “Qubadlının azad olunmasına görə”, “Şuşanın azad olunmasına görə” medalları ilə təltif olunub.
E. Hüseynovun ailə üzvləri övladlarının qəhrəmanlığı ilə fəxr etdiklərini, Vətən müharibəsi şəhidlərinin ailələrinə, qazilərə və müharibə əlillərinə göstərilən diqqət və qayğıya görə Azərbaycan Prezidenti, Ali Baş Komandan İlham Əliyevə, Birinci vitse-prezident Mehriban xanım Əliyevaya öz dərin minnətdarlıqlarını bildiriblər.
Ərəstun ABDULOV,
“Respublika”.