Cəbrayıl rayonunda ənənəvi kənd təsərrüfat sahələrindən biri də baramaçılıqdır. Rayon kümçüləri keçən il 4 ton 900 kiloqram barama istehsal edərək nəzərdə tutulan planı respublikada birincilər sırasında yerinə yetirmişlər. Hər kiloqramı 11 manatdan hesablanan məhsuldan kümçülər xeyli mənfəət əldə etmişlər.
Gəlirli sahə olduğundan cari ildə də rayon sakinləri yeni mövsümə həvəslə hazırlaşırlar. Kümçülər keçən il 115 qutu aldıqları halda, bu il 135 qutu barama qurdu götürüb məhsul istehsal etmək əzmindədirlər.
Rayon Dövlət Aqrar İnkişaf Mərkəzindən aldığımız məlumata əsasən, baramaçılığın inkişafı üçün rayonda yaxşı baza yaradılmışdır. Kümçülər əvvəllər tut yarpağını Beyləqan, Ağcabədi, digər rayonlardan gətirdiklərindən məhsulun maya dəyəri baha başa gəlirdi. İndi Biləsuvar rayonu ərazisində cəbrayıllıların müvəqqəti məskunlaşdıqları ərazidə 161 hektar tut bağı salınmışdır. Builki ağac əkini mövsümündə bağın sahəsi daha 35 hektar artırılmışdır.
Tofiq HÜSEYN,
"Respublika".
