Rəqəmsal inkişaf və nəqliyyat naziri Rəşad Nəbiyevlə Beynəlxalq Telekommunikasiya İttifaqının (BTİ) baş katibi Houlin Jao arasında videokonfrans formatında ikitərəfli görüş keçirilib.

Rəqəmsal İnkişaf və Nəqliyyat Nazirliyindən AZƏRTAC-a bildirilib ki, görüşdə Azərbaycanla Beynəlxalq Telekommunikasiya İttifaqı arasında mövcud və perspektiv əməkdaşlıq müzakirə edilib.

İttifaqın baş katibi Houlin Jao bildirib: "Çox sevindiricidir ki, Azərbaycan İKT sahəsində beynəlxalq əməkdaşlığın daha da artırılmasında maraqlıdır. Prezident İlham Əliyevlə görüşlər zamanı İKT sektorunun inkişafına önəm verdiyinin, böyük diqqət və qayğı ilə yanaşdığının şahidi olmuşam".

Nazir Rəşad Nəbiyev çıxışında Beynəlxalq Telekommunikasiya İttifaqının sahə üzrə faydalı əməkdaşlıq platforması olduğunu söyləyərək Azərbaycanla BTİ-nin münasibətlərinin yüksələn xətlə inkişaf etdiyini qeyd edib.

Eyni zamanda, region ölkələri arasında İKT sahəsi üzrə aparılan müzakirələrdə BTİ-nin uğurlu vasitəçiliyi haqqında danışılıb.

Azərbaycanın gələn il Rumıniyanın paytaxtı Buxarestdə təşkil olunacaq Səlahiyyətli Konfrans zamanı keçiriləcək seçkilərdə BTİ Şurasının üzvü kimi yenidən seçilmək üçün öz namizədliyini irəli sürəcəyi diqqətə çatdırılıb.

Sonda Beynəlxalq Telekommunikasiya İttifaqının baş katibi Houlin Jao Azərbaycanla BTİ arasında qarşılıqlı əməkdaşlığın davam etdiriləcəyinə əminlik ifadə edib.

AZƏRTAC