Vətənin, millətin yolunda canlarını fəda edənlər heç vaxt unudulmur, hər zaman hörmətlə, qürurla yad edilib anılırlar. Belə oğullarımızdan biri də 12-avqust 1991-ci il tarixdə qəhrəmancasına şəhid olan Azərbaycanın Milli Qəhrəmanı Əkbərov Akif Abbas oğludur.
Beyləqan Rayon Mədəniyyət Mərkəzində rayon icra hakimiyyətinin başçısı Asif Ağayevin, hüquq-mühafizə orqanlarının rəhbərlərinin, şəhid ailələri, ,qazilər, sakinlər və şəhidin doğmalarının iştirakı ilə Milli Qəhrəman Əkbərov Akif Abbas oğlunun xatirəsinə həsr olunmuş tədbir keçirildi. Mərasim iştirakçıları Milli Qəhrəmanın büstünün önünə gül dəstələri düzdülər, əziz xatirəsi bir dəqiqəlik sükutla yad edildi. Beyləqan Rayon İcra Hakimiyyətinin başçısı Asif Ağayev Milli Qəhrəman Akif Əkbərovun haqqında danışaraq onun daim qəlblərdə yaşayan ölməz qəhrəmanlıq nümunəsi olduğunu xüsusi vurğuladı. Akif Əkbərov 1952-ci ildə Cəbrayıl rayonunun Balyand kəndində anadan olmuşdur. 1974-cü ildə Beyləqan Rayon Daxili İşlər Şöbəsində polis nəfəri kimi fəaliyyətinə başlayan Akif Əkbərov Polis Şöbəsinin dövlət avtomobil müfəttişliyi bölməsində yol-patrul xidməti müfəttişi vəzifəsində işləməyə başlamışdı. 5 avqust 1991-ci il tarixdə Akif Əkbərov və Beyləqan rayon Polis Şöbəsinin bir qrup digər əməkdaşı Kəlbəcər rayonunun “Sarıyer” yaylağındakı mülki şəxslərin təhlükəsizliyini təmin etmək üçün oraya ezam olunur. Avqustun 12-si ermənilər Cermuq şəhəri tərəfdən “Sarıyer” yaylağına hücuma keçirlər. Əhalini qorumaq üçün polis işçilərimiz döyüşə girir və əsl şücaət göstərirlər. Akif və döyüş yoldaşlarının qətiyyətli mübarizəsi qarşısında ermənilər aciz qalmışdı. Təxminən 6 saat davam edən bu döyüşdə Akif Əkbərov xüsusilə fərqlənir və düşmənin xeyli canlı qüvvəsi məhv edilir. Uzun müddət davam edən şiddətli döyüşdə Akif qəhrəmancasına həlak olur. Beyləqan rayonunda dəfn olunan qəhrəmanımız ailəli idi, ondan Azərbaycan xalqına beş övladı yadigar qalıb. Azərbaycan Prezidentinin 8 oktyabr 1992-ci il tarixli fərmanı ilə Əkbərov Akif Abbas oğlu ölümündən sonra “Azərbaycanın Milli Qəhrəmanı”adına layiq görülmüşdür. Beyləqan şəhərində büstü qoyulub, küçələrdən biri onun adını daşıyır. Tədbirdə Rayon Polis Şöbəsinin rəisi, Milli Qəhrəmanımızın oğlu və yaxınları, döyüş yoldaşları çıxış edərək, Milli Qəhrəmanın şərəflə sürdüyü həyat və döyüş yolundan söz açmış, bir qarış Vətən torpağını belə düşmənə verməmək naminə yüksək hərbi bacarığı, cəsurluğu və igidliyi sayəsində böyük nailiyyətlərlə başa vurduğu qeyri-bərabər savaşda canını fəda edərək şəhidlik zirvəsinə ucaldığını bildirdilər.
Xatirə tədbiri Milli Qəhrəmanımıza həsr olunmuş şeir və kompozisiyalarla davam etdirildi.
Ərəstun ABDULOV,
“Respublika”.
