Azərbaycanda şəkər istehsalı, sənayesi və aqrar sahədə çuğundurun əkilib-becərilməsi respublikamızda müstəqilliyin bərpası dövrü ilə sıx bağlıdır. Çünki nə qədər qəribə görünsə də, keçmiş SSRİ dövründə müttəfiq respublikaların iqtisadi əlaqələri qəsdən, bilərəkdən elə qurulurdu ki, onlar biri -birindən asılı vəziyyətdə qalırdılar. İmperiya siyasəti belə idi. Azərbaycan da şəkəri və qəndi sovetlər dönəmində əsasən Rusiya və ya Ukraynadan idxal edirdi.
Respublikalar müstəqillik ədə etdikdən sonra Moskva tərəfindən zorla qurulan, daha doğrusu, onlara sırınan iqtisadi əlaqələr qırıldı və biz şəkər problemi ilə üzləşdik. O vaxt üçün Azərbaycanın təxminən 8 milyon nəfər əhalisi vardı və şəkərə də tələbat çox idi. Azərbaycan özü çuğundur əkməyə və becərməyə başladı. Bol iqlim qurşaqlarına, münbit torpaqlara malik respublikamızda bizə heç nə problem deyildi. Beləliklə, aqrar sektorda bizim üçün yeni bir bitki olan çuğundur sahələri salınmağa başlandı.
Yeganə çatışmazlıq emal sənayesi sarıdan idi. Ölkə Prezidenti cənab İlham Əliyevin rəhbərliyi altında 2004-cü ildən etibarən Dövlət proqramları qəbul edilməyə başlandı, ilk hədəf kimi də bölgələrdə şəkər zavodları inşa etmək qərara alındı. Beləcə, Cənubi Qafqazın bu sahədə ən böyük müəssisəsi olan İmişli Şəkər Zavodu tikilərək istifadəyə verildi. Hansı ki, sutkada 1200 ton yüksəkkeyfiyyətli kristal şəkər istehsal edir.
Bölgələrdə şəkər zavodu və sexlərinin yaradılması respublikamızda çuğundur əkininə marağı artırdı. Vaxtilə 1 hektar belə çuğundur əkilməyən ölkənin indi 30-a yaxın inzibati rayonunda bu məhsul yetişdirilir və ümumi sahə 5 min hektarı keçib. Dövlət Statistika Komitəsi xəbər verir ki, bu sahələrdən ötən il ilkin çəkidə 194 min tona yaxın məhsul toplanıb. Hər hektardan 391 sentner çuğundur yığılıb ki, bu da Avropa ölkələri göstəricilərindən geri qalmır.
Yeri gəlmişkən qeyd edək ki, respublikamızın Tovuz, Şəmkir, Hacıqabul, Beyləqan, İmişli, Füzuli rayonları ən çox şəkər çuğunduru əkilən bölgələrdir və bu ərazilərdə məhsuldarlıq daha yüksək olur.
Ötən ilin yanvarından çuğundur əkini plantasiyalarının dövlət dəstəyi ilə sığortalanması sahənin inkişafına yeni impuls verib. Çuğundur sahələri sığortalanarkən sahənin yerləşdiyi ərazi, əkin yerinin məhsuldarlığı, seçilən sığorta zərfi və s. nəzərə alınır və buna uyğun olaraq qiymətlər də dəyişir. Belə ki, sığorta qiyməti hər hektardan məhsuldarlıq ən az-8 sentner olarsa 30 manat, çox-930 sentner olarsa 60 manat təşkil edir.
Dövlət dəstəyi ilə sığorta fermerlərin əkinlərini dolu, yanğın, zəlzələ, qasırğa, torpaq sürüşməsi, fırtına, 3 -cü şəxslərin hərəkətləri nəticəsində dəyən ziyanlardan sığortalayır və bu, birinci sığorta zərfinə aiddir.
Fermerlərin əkin sahələrində bitki xəstəlikləri, zərərvericilər, xüsusi təhlükəli ziyanvericilərin yayılmsı isə ikinci sığorta zərfinə aiddir. Xatırladaq ki, sığorta zərfləri biri - birindən qiymət etibarilə fərqlənir və fermerlər yalnız zərfin birini seçə bilərlər.
Nəriman CAVADOV,
“Respublika”.