Cəlilabad Rayon İcra Hakimiyyətinin başçısı Rafiq Cəlilov, hüquq-mühafizə orqanlarının rəhbərləri Aprel şəhidi Röyal Nəsirovun ailəsini ziyarət etdilər. Görüşdə RİH-in başçısı Prezident İlham Əliyevin Aprel şəhidlərinin şücaətini yüksək qiymətləndirdiyini, həmin döyüşləri tarixi qəhrəmanlıq adlandırdığını diqqətə çatdırdı. Qeyd etdi ki, bu döyüşlər 2020-ci ilin 10 noyabr zəfərinə 44 günlük Vətən müharibəsində qazanılan tarixi qələbəyə, doğma Qarabağa yenidən dönüşümüzə aparan yolun ilk uğuru, başlanğıcı kimi səciyyələndirilib. İcra başçısı ailənin qayğıları ilə maraqlanıb, təklif və müraciətlərini dinləyib. Röyal Nəsirovun şərəfli döyüş yoluna nəzər yetirildi. Qeyd olundu ki, Azərbaycanın ərazi bütövlüyü uğrunda canlarından keçən bütün şəhidlərimiz kimi, Röyal Nəsirovun da xatirəsi daim qəlbimizdə yaşayacaq.
Şəhid ailəsi göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlığını ifadə etdilər.
Röyal İmran oğlu Nəsirov 16 mart 1997-ci ildə Cəlilabad rayonunun Məlikqasımlı kəndində anadan olmuşdur. 2015-ci ilin iyul ayında Səfərbərlik və Hərbi Xidmətə Çağırış üzrə Dövlət Xidmətinin Cəlilabad rayon şöbəsi tərəfindən həqiqi hərbi xidmətə çağırılmışdır. 2016-cı ilin aprel ayında Tərtər rayonunda yerləşən cəbhənin təmas xəttində gərgin döyüş zamanı xidməti borcunu yerinə yetirərkən qəhrəmancasına Şəhid olmuşdur. Aprelin 9-da Röyal Nəsirovun nəşi Məlikqasımlı kənd qəbiristanlığında dəfn edilmişdir. Azərbaycan Prezidenti İlham Əliyevin sərəncamları ilə ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına və hərbi hissə qarşısına qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Röyal İmran oğlu Nəsirov ölümündən sonra "Hərbi xidmətdə fərqlənməyə görə" medalı ilə təltif edilmişdir.
Ərəstun ABDULOV,
“Respublika”.
