Azərbaycan Respublikasının Prezidenti İlham Əliyevin təşəbbüsü ilə Ankarada Türk Dövlətləri Təşkilatının Dövlət Başçılarının Fövqəladə Zirvə görüşü keçirilib.
Görüşün Şuşada keçirilməsi nəzərdə tutulmuşdu. Lakin baş vermiş güclü zəlzələlər nəticəsində çətin günlərdən keçən qardaş Türkiyəyə dəstək üçün Azərbaycan Respublikasının Prezidenti İlham Əliyev Zirvə görüşünün Ankarada keçirilməsini təklif edib. Görüşdə iştirak edən dövlətlərin başçıları ilə razılaşdıqdan sonra bununla əlaqədar müvafiq qərar qəbul olunmuşdur. "Fəlakət - Fövqəladə halların idarə edilməsi və humanitar yardım" mövzusuna həsr olunan görüşdə fəlakətlər və onların fəsadları ilə mübarizədə əməkdaşlığın inkişafı ilə bağlı məsələlər müzakirə olunub. Dövlətimizin başçısı Fövqəladə Zirvə görüşündə çıxış edərək zəlzələdə həyatını itirənlərin ailələrinə və yaxınlarına, qardaş Türkiyəyə başsağlığı verdikdən sonra Azərbaycan hökuməti və xalqının zəlzələ baş verən andan qardaş Türkiyəyə humanitar yardımlar etmək üçün səfərbər olduğunu bildirib. Həqiqətən də xalqımız və dövlətimiz Türkiyənin ağır günlərində qardaş ölkəni yalnız qoymadı. Bu da iki dövlət arasında sarsılmaz dostluğun bariz nümunəsidir. Xilasedicilərimiz zəlzələ bölgəsində gecə-gündüz çalışarkən xalqımız dualarını bir an əskik etmədi, tibb personalımız zəlzələ bölgəsində ümumilikdə 3 mindən artıq şəxsə tibbi xidmət göstərdi.
Dövlət başçımız çıxışında türk xalqının 44 günlük müharibə dövründə Azərbaycanın yanında olduğunu da vurğulayaraq bildirib ki, türk dünyası türk dövlətlərinin hüdudları ilə məhdudlaşmır və daha böyük coğrafiyanı əhatə edir.
Qeyd edək ki, Türk Dövlətləri Təşkilatı və ya keçmiş adı ilə Türkdilli Dövlətlərin Əməkdaşlıq Şurası 3 oktyabr 2009-cu ildə Naxçıvan şəhərində Azərbaycan, Türkiyə, Qazaxıstan və Qırğızıstan arasında imzalanan Naxçıvan müqaviləsi ilə qurulan beynəlxalq təşkilatdır. 2018-ci il aprelin 30-da Özbəkistan dövləti də təşkilata qatılmaq istədiyini açıqlamış və 2019-cu ilin sentyabrında Türk Şurasına üzv qəbul olunmuşdur. Təşkilatın əsas məqsədi türkdilli ölkələr arasında hərtərəfli əməkdaşlığa yardım etməkdir. Təşkilatın bayrağı 2012-ci il avqustun 22-də Qırğızıstanın paytaxtı Bişkekdə keçirilən Türk Təşkilatının 2-ci Zirvə görüşündə qəbul edilib. Bayraq Özbəkistan xaric digər üzv ölkələrin bayraqlarına aid simvolların birləşməsindən meydana gəlib və bayraq üzərindəki 8 guşəli ulduz Azərbaycanı təmsil edir. 2020-ci il aprelin 10-da Prezident cənab İlham Əliyevin təşəbbüsü ilə Türk Şurasının videokonfrans vasitəsilə Fövqəladə Zirvə görüşü keçirilib. Zirvə görüşü koronavirus pandemiyası ilə mübarizə mövzusuna həsr olunub. Naxçıvan Müqaviləsinə görə, təşkilatın əsas məqsədi tərəflər arasında qarşılıqlı etimadın və dostluğun möhkəmləndirilməsi, xarici siyasət məsələləri üzrə ümumi mövqelərin işlənib hazırlanması, beynəlxalq terrorizm, separatizm, ekstremizm və transsərhəd cinayətkarlıqla mübarizə üzrə fəaliyyətlərin əlaqələndirilməsindən ibarətdir. Həmçinin ümumi maraq doğuran bütün sahələrdə səmərəli regional və ikitərəfli əməkdaşlığın təşviq edilməsi, ticarət və investisiya üçün əlverişli şəraitin yaradılması, hərtərəfli və balanslaşdırılmış iqtisadi artım, sosial və mədəni inkişafı hədəfləmək, elm, texnologiya, təhsil, səhiyyə, mədəniyyət, idman və turizm sahələrində qarşılıqlı fəaliyyətin genişləndirilməsi, kütləvi informasiya vasitələrinin və digər kommunikasiya vasitələrinin qarşılıqlı fəaliyyətini təşviq olunması, üzv dövlətlər arasında əməkdaşlığın və inteqrasiyanın gücləndirilməsi və hüquqi əməkdaşlığın inkişaf etdirməsi də təşkilatın vəzifələri sırasında yer alır.
Nəzrin CAVADZADƏ,
"Respublika".
