İmişli rayonu Heydər Əliyev mərkəzində 2 Fevral – Gənclər Günü ilə bağlı “Heydər Əliyev və Azərbaycan gəncliyi” mövzusunda tədbir keçirildi. Tədbirdə İmişli Rayon İcra Hakimiyyətinin başçısı Elçin Rzayev, Yeni Azərbaycan Partiyası İmişli Rayon Təşkilatının sədri Səfa Ağayev, rayonun hüquq-mühafizə orqanlarının rəhbərləri, təhsil, səhiyyə, idarə, müəssisə və təşkilatların nümayəndələri, rayonun ictimai-siyasi və mədəni həyatında fəallığı ilə seçilən gənclər iştirak edirdi.
Tədbirdə çıxış edən İmişli Rayon İcra Hakimiyyətinin başçısı Elçin Rzayev qeyd etdi ki, Azərbaycanda 2 fevral tarixinin – Gənclər Günü kimi qeyd olunması müdrik siyasi lider Heydər Əliyevin adı ilə bağlıdır. Əsası ulu öndər Heydər Əliyev tərəfindən qoyulan gənclər siyasəti bu gün ölkə Prezidenti İlham Əliyev tərəfindən uğurla davam etdirilir. Cənab İlham Əliyevin rəhbərliyi ilə həyata keçirilən gənclər siyasəti Azərbaycan gəncliyinin inkişafına təkan vermiş, onların cəmiyyətdə özlərini təsdiq etməsində mühüm rol oynamışdır. Sevindirici haldır ki, Birinci vitse-prezident Mehriban xanım Əliyeva da həm özünün ictimai-siyasi fəaliyyətində, həm də rəhbərlik etdiyi Heydər Əliyev Fondunun həyata keçirdiyi bütün tədbirlərdə yetişməkdə olan gənc nəslin sağlamlığını, intellektual və fiziki inkişafını daim diqqət mərkəzində saxlayır.
YAP İmişli rayon təşkilatının sədri Səfa Ağayev, rayon prokuroru Valeh Səmədov və digər çıxış edənlər gənclərin dövlətimizə, millətimizə layiqli, sağlam və ən əsası vətənpərvər bir vətəndaş kimi formalaşmasını arzu etdilər. Tədbirin sonunda İmişli Rayon İcra Hakimiyyəti başçısı tərəfindən “Fəxri Fərman”lar gənclərimizə təqdim edildi.
Ərəstun ABDULOV,
“Respublika”.