Ermənilərin xalqımıza qarşı həyata keçirdikləri soyqırımıları, etnik təmizləmə və deportasiya siyasəti mənfur qonşularımızın tarix boyu "böyük Ermənistan" xülyası ilə yaşadıqlarını və hər zaman torpaqlarımıza göz dikdiyini təsdiqləyir. Bu barədə YAP Şəki rayon təşkilatı tərəfindən gənc partiya fəalları ilə keçirilən tədbirdə bildirilib.
Tədbir iştirakçıları Heydər Əliyev Mərkəzinə ekskursiya edərək müstəqil Azərbaycan dövlətinin memarı, ümummilli lider Heydər Əliyevin zəngin həyat yolu və müstəsna fəaliyyəti haqqında geniş məlumat alıb, fotoeksponat və kitablarla tanış olublar.
Təşkilatın sədri Daşqın Mikayılov keçirilən bu tədbirlərin gənc nəslin nümayəndələrinə vətənə sevgi hisslərinin aşılanması, onlar arasında milli vətənpərvərlik ruhunun və Azərbaycan tarixinin təbliğ olunması baxımından əhəmiyyətli rola malik olduğunu qeyd edib.
Şəki Heydər Əliyev Mərkəzinin əməkdaşı Pərvanə Rəhimova bildirib ki, xalqımız 31 Mart Soyqırımını qeyd etməklə, bir daha tarixi keçmişə qayıdır və xalqımıza qarşı açıq-aşkar həyata keçirilən soyqırımı qurbanlarının xatirəsini ehtiramla anır. Ulu öndər Heydər Əliyevin hakimiyyətə qayıdışından sonra bu məsələyə prinsipial yanaşma nümayiş etdirilmiş, erməni millətçilərinin xalqımıza qarşı illərlə yürütdüyü soyqırımı və deportasiya siyasətinin mahiyyəti bütünlüklə açıqlanmış və ifşa olunmuşdur. Bu gün isə Prezident İlham Əliyevin rəhbərliyi ilə aparıcı dünya dövlətləri və nüfuzlu beynəlxalq dairələr tərəfindən ölkəmizin ədalətli mövqeyinin etiraf olunması və müdafiəsi istiqamətində ardıcıl və məqsədyönlü işlər görülür.
M.QULUYEV,
"Respublika".
