ABŞ VƏ ÇİN ARASINDA TEXNOLOJİ MÜHARİBƏ BAŞLAYIR
ABŞ Çinə qarşı yeni sanksiyalar paketi tətbiq etməyə hazırlaşır. “Teleqraf.com”un verdiyi xəbərə görə, bu barədə “The Wall Street Journal" nəşrində yayımlanan məqalədə qeyd olunur.
Bildirilir ki, rəsmi Vaşinqton Amerika şirkətlərinə Çinin bir sıra texnoloji sahələrinə yatırım qoymağı qadağan edəcək.
Bununla yanaşı, ABŞ Çinin yarımkeçiricilər sahəsinin inkişafını da əngəlləməyə çalışır. Belə ki, Amerika vətəndaşlarına Çinin texnoloji şirkətlərində işləmək qadağan ediləcək.
Vaşinqtonda hesab edirlər ki, Pekin uzun illər Amerika şirkətlərinin texnoloji kəşflərindən istifadə edərək, Çinin eyni sahədə fəaliyyətini genişləndirib və bu naliyyətlərdən ordunun təchizatı üçün istifadə olunub.
Məlumata əsasən, ABŞ-ın əngəllərinə ilk reaksiya Çinin bu ölkədəki səfirliyindən gəlib. Səfirliyin verdiyi açıqlamada heç bir qadağanın Çin elmi və texnologiyalarının inkişafına mane olmayacağı bildirilib.
Eyni zamanda, qeyd edilir ki, rəsmi Pekin ABŞ qadağalarına qarşı mübarizə strategiyası hazırlamağa başlayıb. Açıqlamaya görə, Çinin təhlükəsizliyi və modernləşdirilməsi üçün lazım olan bütün addımlar atılacaq.
FRANSA SENATI PENSİYA İSLAHATI İLƏ BAĞLI QANUN LAYİHƏSİNİ QƏBUL EDİB
Fransa Senatı qalmaqallı pensiya islahatı ilə bağlı qanun layihəsinin yekun versiyasını qəbul edib. “Report”un verdiyi xəbərə görə, bu barədə “TASS” agentliyi məlumat yayıb.
Bildirilir ki, təqaüd yaşının 62-dən 64-ə qaldırılması haqqında qanun layihəsinin 345 senatordan 193-ü lehinə, 114-ü isə əleyhinə səs verib.
Məlumata əsasən, Senatdan sonra sənədi Milli Assambleya (parlamentin Aşağı Palatası) dəstəkləsə, onda qanun layihəsi qəbul edilmiş sayılacaq.
Eyni zamanda, qeyd edilir ki, Fransa prezidenti Emmanuel Makron Aşağı Palatanın üzvlərini sənədin əleyhinə səs verməməyə çağırıb. O bildirib ki, qanun layihəsinin əleyhinə səs versələr, o halda Milli Assambleyanı buraxacaq.
Xatırladaq ki, Fransada on gündən çoxdur hökumətin pensiya islahatına qarşı etiraz aksiyası keçirilir.
LİVİYADA POLİQONDAN 2,5 TON URAN YOXA ÇIXIB
Beynəlxalq Atom Enerjisi Agentliyinin (BAEA) müfəttişləri Liviya poliqonundan 2,5 ton uranın yoxa çıxmasını aşkar ediblər. “TRT” telekanalının verdiyi xəbərə görə, bu barədə təşkilatın baş direktoru Rafael Qrossi məlumat yayıb.
BAEA rəhbərinin sözlərinə görə, çərşənbə axşamı müfəttişlər yoxlamalar zamanı uran konsentratı şəklində təxminən 2,5 ton təbii uran olan 10 çəlləyin yoxa çıxdığını müəyyən ediblər.
Açıqlamada həmçinin qeyd olunub ki, agentlik uranın qeyd olunan ərazidən çıxarılması və mövcud vəziyyətini aydınlaşdırmaq üçün hərəkətə keçib.
Eyni zamanda, BAEA bununla bağlı araşdırma aparmaq niyyətindədir. Agentlikdə hesab edirlər ki, radioaktiv materialların yerləşdiyi yer barədə informasiyanın itirilməsi şüalanma riski və nüvə təhlükəsizliyinə ciddi təhdid yarada bilər.
Qeyd edilir ki, Liviyadakı poliqonda təftiş işlərinin ötən il keçirilməsi planlaşdırılsa da, regionda təhlükəsizliklə bağlı vəziyyət səbəbindən təxirə salınmışdı.
DÜNYAnın ÇOX YERİNDƏ “STARLİNK”ə QOŞULMAQ MÜMKÜN OLACAQ
Bütün dünyada yüksəksürətli “Starlink” peyk internetinə qoşulmağa imkan verən paket təqdim edilib. “Trend” agentliyinin verdiyi xəbərə görə, “Starlink”in saytındakı məlumata görə, artıq “Roam” portativ qəbulediciləri bütün istehlakçılar üçün əlçatandır.
Məlumata əsasən, internet qəbuledicisini 599 dollara alan istehlakçılar ayda 200 dollar ödəmək şərti ilə “Starlink Roam” abunəçisi olacaqlar.
Açıqlamaya görə, “Roam” abunəçiləri sabit və ya portativ qəbuledicilər almaqla peyk internetindən istifadə edə biləcəklər. Qeyd edək ki, portativ antenanın qiyməti 599-2500 dollar arasında dəyişir.
Eyni zamanda, verilən xəbərə əsasən, “Starlink”in interaktiv əhatə dairəsi xəritəsinə baxsaq, görərik ki, peyk internet layihəsi Avropa, Şimali və Cənubi Amerika və Avstraliyada, eləcə də Afrikanın kiçik bir hissəsində mövcuddur.
İRANIN DÖVLƏT BÜDCƏSİ 224 İRADLA GERİ QAYTARILIB
İran Konstitusiyasına Nəzarət Şurası parlamentin yeni il, 1402-ci il (2023-cü il) üçün təsdiq etdiyi dövlət büdcəsi haqqında qanun layihəsinə 224 irad bildirərək düzəliş edilməsi üçün geri qaytarıb. Bu barədə “Report” agentliyinin məlumatında qeyd olunur.
Verilən xəbərə əsasən, İranda yeni il martın 22-dən başlayır. Artıq gələn həftə yeni il daxil olur. Lakin ölkə iqtisadiyyatında yaranmış problemlər və inflyasiyanın artması dövlət büdcəsinin qəbulunda ciddi problem yaradıb.
Parlamentlə hökumət arasında bir sıra məhsulların, o cümlədən gündəlik tələbat mallarının qiymətinin qalxması ilə bağlı fikir ayrılığı mövcuddur.
Məlumat üçün qeyd edək ki, İran Konstitusiyasına Nəzarət Şurası ölkənin ali dini lideri ayətullah Seyid Əli Xameneinin başçılıq etdiyi ali rəhbərlik qurumunun əsas idarəetmə institutu sayılır. Şura təsdiqləyəndən sonra sənədi Xamenei imzalayır. Bundan sonra qanun və ya qərar icra üçün qüvvəyə minir.
TÜRKİYƏDƏ SEL FƏLAKƏTİ ZAMANI ÖLƏNLƏRİN SAYI ARTIB
Türkiyənin cənub-şərqində baş verən şiddətli sel nəticəsində ölənlərin sayı artıq 15 nəfərə çatıb, daha 5 nəfər isə itkin düşüb. “AZƏRTAC”ın verdiyi xəbərə görə, Türkiyənin Təbii Fəlakət və Fövqəladə Hallar Agentliyinin (AFAD) məlumatına əsasən, leysan yağışlar Adıyamanın Tut və Malatyanın Doğanşehir rayonlarında çayların məcrasından çıxmasına səbəb olub. Seldən ən çox zərər görən Şanlıurfada 13 nəfər, Adıyamanda isə 2 nəfər həlak olub.
Bununla yanaşı, bildirilir ki, təbii fəlakət nəticəsində yaşayış binaları, xəstəxanalar və bəzi müəssisələr, həmçinin zəlzələdən zərər çəkən sakinlərin məskunlaşdığı çadır şəhərcikləri su altında qalıb.
Eyni zamanda, Türkiyənin meteorologiya xidməti yaxın günlərdə ölkənin cənub-şərq regionu üçün narıncı təhlükə səviyyəsi elan edib. Belə ki, Adıyaman, Diyarbakır, Elazığ, Malatya, Kahramanmaraş, Mardin, Sivas, Şanlıurfa, eləcə də Kilis vilayətlərində leysan yağışlar yağacağı və nəticədə sel təhlükəsi yaranacağı proqnozlaşdırılır.
Agentlik xatırladır ki, 2021-ci ilin avqustunda Türkiyənin Qara Dəniz regionunun şimalı güclü daşqınların təsirinə məruz qalmışdı. Nəticədə Kastamonu, Sinop, Bartın və Samsun vilayətlərində 82 nəfər həlak olmuşdu.
YAPONİYA KXDR-İN RAKET BURAXILIŞINA ETİRAZ EDİB
Yaponiya hökuməti cümə axşamı həyata keçirilən ballistik raketin buraxılışı ilə bağlı KXDR-ə etiraz edib. “Report” agentliyinin verdiyi xəbərə görə, bu barədə Yaponiyanın paytaxtı Tokioda keçirilən mətbuat konfransında Nazirlər Kabinetinin baş katibi Hirokazu Matsuno bəyan edib.
“Biz Yaponiyanın Pekindəki səfirliyi vasitəsilə Şimali Koreyaya etirazımızı bildirdik. Bu cür hərəkətlər ölkəmizin və bütün regionun təhlükəsizliyini təhdid edir”, - deyə baş katib vurğulayıb.
Eyni zamanda, Yaponiya Müdafiə Nazirliyi bu ərəfədə məlumat yayıb ki, Şimali Koreyanın cümə axşamı atdığı ballistik raket qitələrarası olub.
Qeyd olunub ki, Şimali Koreya raketinin maksimal uçuş hündürlüyü 6 min kilometri keçib və uçuş təxminən 70 dəqiqə davam edib, uçuş məsafəsi isə bir neçə min kilometr təşkil edib.
Hazırladı:
Vamiq ABBASOV,
“Respublika”.
