VLADİMİR PUTİN “G20” SAMMİTİNDƏ İŞTİRAK EDƏ BİLƏR
Rusiya prezidenti Vladimir Putinin 2023-cü ilin sentyabrında Hindistanda keçirilməsi planlaşdırılan “G20” sammitində iştirakı istisna edilməyib və bu barədə qərar ayrıca veriləcək. “Sputnik” informasiya agentliyinin verdiyi xəbərə görə, bunu Rusiya prezidentinin mətbuat katibi Dmitri Peskov jurnalistlərlə görüşü zamanı qeyd edib.
Mətbuat katibi vurğulayıb ki, Putinin bu görüşdə iştirak ehtimalı hər zaman var və bunu istisna etmək olmaz. Eyni zamanda, Rusiya bu və ya digər formatda, həmçinin prezidentin sammitdə birbaşa iştirakı olmadan da “G20”də hansısa şəkildə təmsil olunur.
Xatırladaq ki, 2022-ci ildə “G20” liderlərinin görüşünə Rusiyadan Xarici İşlər Nazirliyinin rəhbəri Sergey Lavrov gedib. 2020-2021-ci illərdə Vladimir Putin görüşlərdə videobağlantı vasitəsilə iştirak edib. Prezident şəxsən görüşə son dəfə sammitin Yaponiyada keçirildiyi 2019-cu ildə gedib.
İRANDA İLAXIR ÇƏRŞƏNBƏ TƏDBİRLƏRİNDƏ ÖLƏN VƏ YARALANANLAR VAR
İranda ilaxır çərşənbə münasibətilə keçirilən tədbirlərdə 383 nəfər yaralanıb, 16 nəfər isə dünyasını dəyişib. “Report”un “Fars” agentliyinə istinadən verdiyi xəbərə görə, bunu İranın Fövqəladə Hallar Təşkilatının rəhbəri Cəfər Miadfər bildirib.
Təşkilat rəhbərinin sözlərinə görə, yaralılar hazırda ölkənin 4 hospitalına yerləşdirilib. “Təəssüf ki, 58 amputasiya əməliyyatı keçirilib, 101 göz xəsarəti alan var. Xəsarət alanlara görə ən yüksək göstərici məhz Tehranda qeydə alınıb”, - deyə Cəfər Miadfər vurğulayıb.
Eyni zamanda, təşkilat rəhbərinin sözlərinə görə, Tehranda 97 nəfər yaralanıb, 7 nəfər isə dünyasını dəyişib.
Bununla yanaşı, Tehranın Yanğınsöndürmə İdarəsinin baş direktoru Qədrətullah Məhəmmədinin sözlərinə görə, yanğınlar əsasən qaz doldurulmuş “arzu şarları”nın partlaması nəticəsində baş verir.
“Balonların uçarkən enəcəyi yer və mövqeləri məlum olmur. Balonlar bəzən ağaclara, eyvanlara və binaların damlarına düşərək yanğına səbəb olur”, - deyə idarənin baş direktoru əlavə edib.
BÖYÜK BRİTANİYA MÜDAFİƏ XƏRCLƏRİNİ ARTIRMAĞI PLANLAŞDIRIR
Böyük Britaniya hökuməti müdafiə xərclərini ÜDM-in 2,5 faizinə çatdırmaq niyyətində olduğunu açıqlayıb. “Report”un verdiyi xəbərə görə, bu məlumat hökumətin 2023-cü ildə təhlükəsizlik, müdafiə, inkişaf və xarici siyasət prioritetlərinin kompleks icmalında öz əksini tapıb.
Məlumata əsasən, sənəddə qeyd olunub ki, 2020-ci ildə Boris Conson hökuməti müdafiə xərclərinin böyük artım proqramını təsdiqləyib və Ukraynaya hərbi yardım daxil olmaqla bu il Böyük Britaniyanın ümumi hərbi xərclərinin ÜDM-in 2,2 - 2,29 faizinə çatacağı gözlənilir.
Hökumət qeyd edib ki, müdafiə xərclərinin yeni səviyyəyə qaldırılması ölkənin NATO-da liderliyini gücləndirəcək və Ukraynadakı münaqişədən əldə edilmiş dərsləri nəzərə alaraq Böyük Britaniya Silahlı Qüvvələrinin modernləşdirilməsini sürətləndirməyə kömək edəcək.
Bununla yanaşı, ölkə hökuməti müdafiə proqramı üçün əlavə 5 milyard funt-sterlinq ayırmaq niyyətini təsdiqləyib.
TELEFON QULAQCIQLARI EŞİTMƏ CİHAZINI ƏVƏZ EDƏ BİLƏR
“Apple” qulaqcıqları eşitmə qabiliyyətini itirmiş insanlar tərəfindən istifadə edilə bilər. “Sputnik” informasiya agentliyinin verdiyi xəbərə görə, bu barədə “Bloomberg” nəşri məlumat yayıb.
Nəşrin köşə yazarı Mark Qurmanın sözlərinə görə, Amerika şirkəti özünün “AirPods” seriyalı qulaqcıqlarının imkanlarını genişləndirmək niyyətindədir. Qulaqcıqların eşitmə qabiliyyətini itirmiş insanlar üçün cihazların tələblərinə cavab verməsi məqsədilə yenilənməsi planlaşdırılır.
Mark Qurman qeyd edib ki, şirkət növbəti və ya iki il ərzində istehsal etdiyi qulaqcıqlara yeni funksiyalar əlavə edəcək.
Materialda bildirilir ki, brendin bir çox qurğuları sağlamlıqyönümlü funksiyalara malikdir. Xüsusilə “AirPods” qulaqcıqlarını eşitmə cihazı kimi istifadə etməyə qismən imkan verən seçimlər var.
ABŞ PREZİDENTİ TEZLİKLƏ Sİ CİNPİNLƏ DANIŞIQLAR APARMAQ İSTƏYİNİ AÇIQLAYIB
ABŞ prezidenti Cozef Bayden tezliklə Çin sədri Si Cinpinlə yenidən telefon və ya videoəlaqə ilə danışıqlar aparmaq istəyini bir daha təsdiqləyib. “Trend” agentliyinin verdiyi xəbərə görə, bunu ABŞ lideri Böyük Britaniyanın baş naziri Rişi Sunakla Kaliforniyada baş tutan ikitərəfli görüşdə jurnalistlərin suallarını cavablandırarkən bəyan edib.
Cozef Baydeni bu səfərdə müşayiət edən Ağ Evin mətbuat xidmətinin məlumatına görə, ABŞ administrasiyasının rəhbəri yaxın gələcəkdə Si Cinpinlə danışıb-danışmayacağı sualına müsbət cavabı versə də, bu danışıqların nə vaxt baş tutacağını dəqiqləşdirməyib.
Eyni zamanda, ABŞ liderinin milli təhlükəsizlik üzrə köməkçisi Ceyk Sallivan bildirib ki, Si Cinpin və Cozef Bayden arasında yeni danışıqların tarixi hələ müəyyən edilməyib.
HALUK GÖRGÜN: TÜRKİYƏNİN artıq “S-400” SİSTEMLƏRİNƏ EHTİYACI YOXDUR
Türkiyə öz zenit-raket komplekslərini istehsal etməyə başladığından Rusiyanın “S-300” və ya “S-400” sistemlərinə ehtiyac duymur. “Report” agentliyinin verdiyi xəbərə görə, bu barədə “Milliyet” qəzeti “Aselsan” Müdafiə Korporasiyasının baş direktoru Haluk Görgünə istinadən məlumat yayıb.
“Biz hava hücumundan müdafiə sistemləri istehsal edirik. “S-300” və ya “S-400”ə ehtiyacımız yoxdur. Biz bu ehtiyacı aradan qaldırırıq. Bu, bizim əsas missiyamızdır”, - deyə baş direktor vurğulayıb.
Eyni zamanda, Haluk Görgün qeyd edib ki, Türkiyə sənayesi qabaqcıl “Siper” hava hücumundan müdafiə sistemi istehsal edir. Onun sözlərinə görə, sınaqlar zamanı sistem 100 kilometr məsafədəki hədəfləri uğurla vurub.
Məlumat üçün qeyd edək ki, bir neçə il öncə Türkiyə Rusiyadan 2,5 milyard ABŞ dolları dəyərində olan 4 diviziya “S-400” hava hücumundan müdafiə sistemləri alıb.
ÇİN BÜTÜN KATEQORİYALI VİZALARIN VERİLMƏSİNİ BƏRPA EDİR
Çin martın 15-dən etibarən xarici vətəndaşlara ölkəyə daxil olmaq üçün bütün kateqoriyalı vizaların rəsmiləşdirilməsini və verilməsini bərpa etmək niyyətindədir. “Trend” agentliyinin verdiyi xəbərə görə, bu barədə Çin Xalq Respublikası Xarici İşlər Nazirliyinin Konsulluq İşləri Departamenti məlumat yayıb.
Açıqlamaya əsasən, vətəndaşların sərhəddən keçməsini daha da yaxşılaşdırmaq üçün martın 15-i Pekin vaxtı ilə saat 00:00-dan vizaların verilməsi və əcnəbi vətəndaşların Çinə daxil olması siyasətində düzəlişlərin edilməsi qərara alınıb.
“Xaricdə viza verən orqanlar Çinə səfər edən əcnəbi vətəndaşlara bütün kateqoriyalı vizaların işlənməsini və verilməsini bərpa edəcək”, - deyə açıqlamada qeyd olunur.
Hazırladı:
Vamiq ABBASOV,
“Respublika”.