Vətən müharibəsində adlarını hərb tariximizə qızıl hərflərlə yazdıran Cəlilabadın igid oğullarının xatirəsi əziz tutulur. Şəhidlərimizin ailələri daim yad olunur. Şanlı Zəfər yürüşündə qəhrəmanlıq göstərərək canından keçmiş şəhid oğullarımızdan biri də Musayev Ələkbər Əlövsət oğludur.
Cəlilabad Rayon İcra Hakimiyyətinin başçısı Rafiq Cəlilov, icra aparatının məsul işçiləri və rayonun hüquq-mühafizə orqanlarının rəhbərləri şəhid Ələkbər Musayevin ailəsini ziyarət etdi. Rafiq Cəlilov şəhidin valideynləri ilə söhbət edib, onların gündəlik qayğı və problemləri ilə maraqlandı. Şəhidin valideynləri ilə görüş zamanı Rafiq Cəlilov bildirdi ki, Ali Baş Komandan cənab İlham Əliyevin komandanlığı ilə silahlı qüvvələrimiz Qarabağda tarixi qələbə qazandılar. Bu gün biz şəhid ailələri və qazilərimizə hər cür mənəvi və maddi dəstək göstərməliyik. Ölkəmizin ərazi bütövlüyü uğrunda gedən döyüşlərdə qəhrəmancasına şəhid olmuş əsgərlərin xatirəsi daima yaddaşlarda qalacaq. Məhz onların göstərdiyi şücaət nəticəsində uzun illərdir işğal edilmiş torpaqlarımız işğaldan azad olunmuşdur. Rafiq Cəlilov qeyd etdi ki, Ali Baş Komandan İlham Əliyevin rəhbərliyi ilə döyüşlərdə ordumuz bir daha dünyaya qüdrətini sübut etmiş, şəhidlərimizin qanı yerdə qalmamışdır.
Ələkbər Əlövsət oğlu Musayev 1999-cu il iyunun 16-da Cəlilabad rayonunun Mollalı kəndində anadan olub. 2017-2019-cu illərdə Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olmuşdur. Goranboy rayonunda yerləşən "N" saylı hərbi hissəsində xidmət etmişdir. Sonra hərbi xidmətini müddətdən artıq həqiqi hərbi xidmət qulluqçusu kimi davam etdirmişdir. Azərbaycan Ordusunun əsgəri Ələkbər Musayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə savaşıb, sentyabrın 29-da Murovdağ döyüşləri zamanı şəhid olub. Onun nəşi uzun müddət tapıla bilməyib. Müdafiə Nazirliyi tərəfindən rəsmi olaraq itkin düşən hərbi qulluqçu hesab olunub. 2021-ci il aprelin 27-də nəşi tapılıb və Cəlilabad rayonunun Mollalı kəndində dəfn olunub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə, Azərbaycan Prezidenti İlham Əliyevin Sərəncamına əsasən Musayev Ələkbər Əlövsət oğlu ölümündən sonra "Vətən uğrunda" medalı ilə təltif edilmişdir. Görüş zamanı şəhidin valideynləri onlara göstərilən diqqət və qayğıya görə Azərbaycan Prezidenti İlham Əliyevə dərin minnətdarlıqlarını bildirdilər.
Ərəstun ABDULOV,
“Respublika”.
