Vətən üçün doğulmaq, Vətən üçün yaşamaq, Vətən üçün ölmək şərəflidir. Belə vətən fədailərindən biri də qəhrəmanlığı, yüksəldiyi şəhidlik zirvəsi ilə ürəklərdə yaşayan, torpaqlarımızın bütövlüyü uğrunda gedən döyüşlərdə qəhrəmancasına şəhid olan şəhid Mayor Hüseynov Nazim Yaqub oğludur.
O, 1977-ci il oktyabr ayının 1-də İmişlinin Bəhrəmtəpə qəsəbəsində doğulub boya-başa çatıb. Bu gün yaşasaydı, 44 yaşını qeyd edəcəkdi. Vətən müharibəsi zamanı Füzulinin, Cəbrayılın və Xocavəndin azadlığı uğrunda gedən döyüşlərdə iştirak edib. Mayor Nazim Hüseynov oktyabrın 8-də Hadrut döyüşləri zamanı şəhid olub və İmişli rayonunun Bəhrəmtəpə qəsəbəsindəki qəbiristanlıqda dəfn edilib.
Azərbaycan Prezidenti İlham Əliyevin müvafiq sərəncamları ilə ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə, şəxsi igidlik və şücaət nümayiş etdirdiyinə görə Hüseynov Nazim Yaqub oğlu ölümündən sonra “Vətən uğrunda”, “Füzulinin azad olunmasına görə” və “Hərbi xidmətlərə görə” medalları ilə təltif edilib.
Doğum günündə keçirilən mərasimdə İmişli Rayon İcra Hakimiyyətinin başçısı Elçin Rzayev, hüquq-mühafizə orqanlarının rəhbərləri şəhidin yaxınları və məktəblilər iştirak etdilər. Mərasimdə iştirakçılar tərəfindən şəhidimizin məzarı ziyarət edilib, önünə gül-çiçək dəstələri qoyulub, ruhuna dualar oxundu. RİH başçısı bildirdi ki, rəşadətli Azərbaycan Ordusu 2020-ci ilin 27 sentyabrında başlayan İkinci Qarabağ müharibəsində Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə müasir hərb tarixi üçün nümunə olan əsl qəhrəmanlıq dastanı yazdı.
Mərasim iştirakçıları Nazim Hüseynovun ata ocağına gələrək Vətən uğrunda canından keçən şəhidimizə Allahdan rəhmət, ailəsinə səbir dilədilər. Burada çıxış edənlər Nazim Hüseynovun keçdiyi mənalı həyat yolundan söz açaraq, vətənimizin bütövlüyü uğrunda mübarizədə canlarından keçmiş şəhidlərin əziz xatirələrinin daim uca tutulacağını qeyd etdilər. Məktəblilər vətənpərvərlik mövzusunda şeirlər səsləndirdilər.
Ərəstun ABDULOV,
“Respublika”.