Beyləqan Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin Rayon Şöbəsinin birgə təşkilatçılığı ilə Beyləqan Rayon İcra Hakimiyyətində şəhid ailələri və qazilərlə görüş təşkil edildi.
Prezident İlham Əliyevin müvafiq sərəncamlarına əsasən xalqımıza qələbə sevinci bəxş edən, bu yolda canından, qanından keçərək həlak olmuş qəhrəman şəhidlərimizin ailələrinə və Vətən müharibəsi iştirakçılarının növbəti dəfə medallarla təqdim olunma mərasimi keçirildi.
Azərbaycanın ərazi bütövlüyü uğrunda canlarını fəda etmiş şəhidlərimizin xatirəsi bir dəqiqəlik sükutla yad edildi. Tədbirdə Beyləqan Rayon İcra Hakimiyyətinin başçısı Asif Ağayev 44 günlük Vətən müharibəsində Müzəffər Ali Baş Komandanın rəhbərliyi altında Azərbaycan ordusunun şücaətindən danışdı. Bildirdi ki, dövlət başçısının diqqət və qayğısı sayəsində Azərbaycan ordusu nəinki Cənubi Qafqazın, dünyanın ən peşəkar orduları sırasına yüksəlib. Vətən müharibəsində Azərbaycan Ordusunun peşəkarlığı dünyanın müxtəlif ölkələrinin hərbi ekspertləri tərəfindən yüksək qiymətləndirilib. Rayon rəhbəri şəhidlərimizin və müharibə iştirakçılarının qəhrəmanlığından söz açaraq onlarla bütün Azərbaycan xalqının fəxr etdiyini, yaddaşlardan silinməyən bir tarix yazdıqlarını qeyd etdi. Asif Ağayev Vətənə layiqli oğullar yetişdirdikləri üçün şəhid və Vətən müharibəsi iştirakçılarının ailələrinə minnətdarlığını bildirdi.
Tədbirdə 55 nəfər döyüş iştirakçısı, 8 şəhid ailəsi, 10 nəfər qazi iştirak edib. Ümumilikdə, Beyləqan rayonu üzrə 425 qazi, döyüş iştirakçısı və şəhid ailəsinə medal və ordenlər təqdim olunub.
Şəhid ailələrinin üzvləri və Vətən müharibəsi iştirakçıları onlara göstərilən diqqət və qayğıya görə Prezident, Silahlı Qüvvələrin Ali Baş Komandanı İlham Əliyevə öz minnətdarlıqlarını bildiriblər.
Ərəstun ABDULOV,
“Respublika”.