Payızlıq əkinlərin başlanması ilə əlaqədar Kənd Təsərrüfatı Nazirliyinin təşkilatçılığı ilə bölgələrdə informasiya kampaniyasına start verilib. “100 kənddə 100 təlim” adlı kampaniya Aqrar Xidmətlər Agentliyinin Aqrar Təlim Mərkəzi tərəfindən həyata keçirilir. İnteraktiv formatda keçirilən tədbirlərin təşkilində məqsəd fermerlərin bilik və bacarıqlarının artırılmasına nail olmaq, onları payızlıq əkinlər ərəfəsində aqrotexniki tədbirlərin düzgün təşkili barədə məlumatlandırmaqdır. Nazirliyin mətbuat xidməti bildirir ki, Layihə çərçivəsində 35 min fermerin təlimlərə cəlb olunması nəzərdə tutulur.
Bu məqsədlə 18 rayon üzrə seçilmiş 100 kənddə Aqrar Təlim Mərkəzinin peşəkar mütəxəssisləri tərəfindən ilk təlimlər Salyan rayonunun Kürsəngi, Xələc, Qarabağlı, Şorsulu kəndlərində və Neftçala rayonunun Aşağı Qaramanlı kəndində keçirilib. Təlimlərə cəlb olunan fermerlərə bol və keyfiyyətli məhsul əldə etmək üçün zəruri olan aqrotexniki tədbirlər, taxıl əkininin texnoloji xəritəsi, səpin və gübrə norması, aqrokimyəvi analizin fermerlərə verdiyi üstünlüklər, sertifikatlı toxumdan istifadənin məhsuldarlığa müsbət təsiri, növbəli əkin sistemi, taxıl sahələrində xəstəliklərə, zərərvericilərə və gəmiricilərə qarşı mübarizənin təşkili və digər aktual mövzularda məlumatlar verilib, onları maraqlandıran suallara aydınlıq gətirilib.
Fermerlərin yüksəkkeyfiyyətli sertifikatlaşdırılmış toxum və gübrələrə əlçatanlığını təmin etmək üçün təlim keçirilən kəndlərdə səyyar toxum və gübrə satışı da təşkil olunur.
Neftçala rayonunun Aşağı Qaramanlı kəndində keçirilən təlimdə iştirak edən kənd təsərrüfatı naziri İnam Kərimov fermerləri təlimlərdə aktiv iştiraka çağırıb. Nazir bildirib ki, fermerlərin aqrar sahənin müxtəlif istiqamətləri üzrə təlimlərə cəlb etmək nazirliyin əsas fəaliyyət istiqamətlərindən biridir. Bu məqsədlə Nazirlik tərəfindən illik təlim planı təsdiqlənib, plan əsasında nazirliyin müxtəlif qurumlarının əməkdaşları, o cümlədən Aqrar Təlim Mərkəzinin mütəxəssisləri tərəfindən müxtəlif mövzularda sahəvi təlimlər təşkil olunur.
Tədbirdə təlim ehtiyaclarının müəyyən olunması ilə bağlı sorğu keçirilib, fermerlərin təklifləri qeydə alınıb. “100 kənddə 100 təlim” layihəsi çərçivəsində növbəti tədbirlər gələn həftə Ağcabədi və Tərtər rayonlarında da təşkil olunacaq.
Nəriman CAVADOV,
“Respublika”.
